朋友最鍾意問小記，日本上網究竟買上網 SIM 卡，還是租 Wi-Fi 蛋好。若然買上網數據卡的話，香港邊度有得買？還是去日本買？眼見咁多人問，以及農曆新年後又到咗遊日賞梅、賞櫻嘅旅遊旺季，小記就係度整個遊日上網合集，等大家跟隨自己嘅喜好選擇啦！
01：懶鬼型
叫得做懶鬼，當然連出街買 SIM 卡嘅動力都冇啦！但叫你係手機撳幾個掣，都還算可以吧。各大網絡商都有數據漫遊日費計劃，大家只要用手機撳幾個掣就可以即刻申請得到，只不過數據漫遊日費都幾貴下，四大網絡商中，以 SmarTone 精裝漫遊數據日費計劃最平，每日 $68，若然你去 5 日的話，就要 $340，比起買上網 SIM 卡貴成 2 倍有多。懶 ... 確實係要付出代價嘅！
四大網絡供應商漫遊日費計劃詳情
【3HK】
【csl.】
【SmarTone】
【中國移動香港】
02：一大班朋友型
一大班朋友去日本，租 Wi-Fi 蛋開心「柴牙」用就最好，皆因唔使個個買上網 SIM 卡，計番租蛋費用，再除開人均消費，分分鐘比買上網 SIM 卡仲要平。好似 Wi-Fi BB 租蛋（日本）每日只需 $40，去 5 日就合共 $200，若然有 5 個人的話，平均每人只要 $40，係咪平過買上網 SIM 卡好多呢！
而且現時好多租 Wi-Fi 蛋公司，已經係香港機場開設店舖，無論係借機、還機，都可以係機場輕鬆搞掂；再加上好多公司都提供早鳥（early bird）優惠，預早 book 仲會平啲，咁筍大家就要留意啦！此外，消委會亦曾公布過有關租蛋嘅注意事項！
熱門租 Wi-Fi 蛋公司
【Crazy Egg】
【Wifi Egg】
【WiFi BB】
【Visondata】
03：拍拖型 / 獨享型
兩個人拍拖去日本，甚至一個人去日本，租 Wi-Fi 蛋無一大班人 Share 就即刻變得唔划算，皆因其實去深水埗買張日本上網 SIM 卡，至抵價都只係 $65 就可以用足 7 日。不過，大家要留意每款上網 SIM 卡都有唔同嘅規定，有部分提供每日 200MB 數據，之後就會限速。亦有部分好似 759 阿信屋嘅日韓 SIM 卡咁，表明唔畀 Tethering，所以買之前最好要問清楚。
唔想去深水埗，大家仍可選擇於中國聯通網上商店，網購日本上網卡，而家中聯通做緊特價，7 日 1GB 只係賣 $98、7 日 5GB 就賣 $168。又或者購買 SmarTone 推出包括日本的亞洲旅遊數據卡，$228 有 7 日 4G LTE 無限上網。此外，大家亦可於淘寶網店，購買富士卡、櫻花卡等，最平嘅幾十蚊人仔就有交易！
04：大頭蝦型
叫得做大頭蝦，當然係乜都無買就匆匆忙忙趕飛機飛去日本。想要上網，其實日本當地一樣有上網 SIM 卡賣，而且一落機，係東京成田機場就有得係自動販賣機度買，佢分 7 日及 14 日兩款，售價約 HK$216 及 HK$309。唔想係機場買，出到去 Yodobashi、Bic Camera 電器舖，都有 Freetel prepaid SIM 卡畀你買，它雖然只限 1GB 數據，但就可以任用 WhatsApp、Facebook 同 Line 等通信軟件，而且只售約 HK$114，比機場哪張平得多。
唔買上網卡，日本都開始有好多 Free Wi-Fi 熱點畀大家用，好似係 JR 東日本、JR 東海、東京地鐵、都營地下鐵、京王電鐵等鐵路沿線，就已經有 Free Wi-Fi。另外，FamilyMart 及 Lawson 日本便利店，亦有 Free Wi-Fi 畀大家用，所以話係日本上網其實好方便！
Source：ezone.hk