喺 Pokemon Go 入面，人物 Level 同小精靈 CP 值係掛鉤，所以升人物 level 係成個遊戲入面最重要嘅一環。當玩家去到 Level 9 時，遊戲就會送 Lucky Egg，呢隻蛋嘅作用係令大家喺 30 分鐘內經驗雙倍，而記者今朝就喺觀塘實測雙倍經驗蛋。
測試之前人物有 Level 12，而測試地點附近嘅 Pokestop 都有誘怪香。記者打開 Lucky Egg 之後，就跑去唔同 Pokestop 收集補給，因為去呢啲都會有 XP。喺未有野生小精靈出現之前，小記就幫已經準備好嘅精靈進化，因為進化係拎最多 XP 嘅方法，但係就要逼迫要睇一陣進化動畫（其實幾浪費時間！）。之後遇到新小精靈，成功捕捉就有 1220 XP，而捉到之前遇見過嘅都有雙倍經驗！由於附件精靈數量唔知點解特別少，加上罕有度比較低，所以最後記者都只係升到 13 Level。
雖然記者今次又以「新手 Mode」Fail 咗，不過我地可以從失敗中學習，所以就總結咗以下善用 Lucky Egg 嘅黃金 30 分鐘策略大全。
1. 見到精靈就捉
去多啲裝咗 Lure Module 嘅 Pokestop，自己開埋 Incense，因為出現小精靈機會率比較高。同埋要不斷捉 Pokemon，重覆都要捉，因為捉精靈係有經驗值架！而捉到新小精靈又會比舊小精靈多一倍經驗，配合埋 Lucky Egg 咁就會有雙倍經驗。
2. 計算進化材料
要儲夠進化材料，包括 Candy 同 Pokemon。當捉到小精靈時，系統就會送 3 粒精靈專屬 Candy，而將小精靈 Transfer 都會有 1 粒 Candy。而波波、獨角蟲同綠毛蟲進化只需要 12 粒 Candy，換言之，只要各自捉到 4 隻小精靈，就可以進化一隻小精靈啦！對比其他精靈要 50 Candy，呢三款精靈嘅進化成本比較低，但係就可以比大家吸大量經驗值。
3. 集中進化
Pokemon 唔好進化住，要儲住先。因為進化一隻小精靈可以有 500-1000 XP，而將所有進化都放喺 Lucky Egg 30 分鐘內進行，咁就升一隻精靈就有 1000-2000 XP 啦！
Source：ezone.hk
【專題報道】