正所謂，去廁所其實都要睇運氣。街上嘅馬桶唔似得屋企個個咁，需要每日停不了的「接待」咁多客人。想要乾乾淨淨？實在難！但好多野唔到我地去揀，尤其係肚痾來襲急需要大解放時，點樣都要硬住頭皮，擺…陣！冇錯，高登就有絲打傳授咗一套完整嘅「公廁廁所板舖廁紙陣法」。風水佬就扼你十年八年者，呢個陣法貨真價實，只要大家學返一兩招「陣法」旁身，包保以後出去面對咩類型嘅馬桶都可以安心大解放！
首先，最基本嘅陣法為《六花陣》。簡單而言，就係用 6 張廁紙組成一個六角型廁紙陣。絲打表示，此陣廁紙消耗量屬中等，覆蓋範圍高，擺法簡單，新手入門必學。升級版為《八卦陣》，原理一樣，不過係用多 2 張廁紙組成一個八角型廁紙陣。好處為覆蓋範圍更高，不過擺陣時間比較長，只能算為中階陣法。此兩陣著重於衛生，不過就忽略咗避免公廁水花「回彈」嘅問題。
基本陣法之後就到變化陣，想要講求速度，打工仔必學！就係《馬其頓方陣》，快速扯出 4 條廁紙平排放好即可，快而準。首先，避免公廁水花「回彈」，因為承托力十足。不過此陣並不適合肚痾人士，否則會有長時間的清潔煩惱。肚痾人士可以選擇承托力及「回彈」度都有不錯表現嘅《羅馬方陣》。此陣需要用廁紙梅花間竹交織成一個連貫嘅保護層，所以廁紙是獨立又是連貫。地心吸力會令廁紙中部會被擊潰，型成一個窿，不過其餘部位依然繼續受到嚴密保護。缺點係，擺陣時間極長，另需要有編織技能。
要數比較特別嘅陣法，就有參考二戰時期擺陣方式嘅《縱深作戰陣》以及《裝甲矛頭陣》。《縱深作戰陣》屬於蘇聯陣法，囊括咗長度同深度，只要將一張廁紙浮於水面上，即可有短暫壓水花作用。可惜，量多不適用。而德軍方面則使用《裝甲矛頭陣》(Armored Spearhead）據說德語為 Panzerspitze，睇圖就知只適用於巴打 ONLY。除非絲打有特別需要。
特別對策，如廁紙數量不夠，則有日本戰國時期武田八陣型之中嘅《偃月陣》。尤如其名，只有半邊。雖然衛生度欠缺不過可以確保廁紙數量充足。總好過問隔離借廁紙？
而最高端嘅陣法，為英、美空軍的《 V 形陣》（Vic formation）！技巧甚高，只需用到兩張廁紙。不過此陣並非陸軍所用，而是空軍...看圖即可明白。初學者需要雙腳呈 V 字狀頂住廁格兩邊牆身借力，熟練者就有如空軍起飛....
而最後一陣並非為香港人而設，韓信嘅《背水陣》，置之死地而後生，是為北方人士（於廁所外）常用的一個陣法。當然，若各位面對肚痛到腳軟、頭暈、全新發麻，但無時間舖廁紙，或無廁紙的情況，亦可背水一戰，完全放鬆，席地而...此乃奇章陣法，有好大機會觸發清潔姐姐怒髮衝冠，切勿亂用。
Source：啊雞 @ 香港高登