RIMOWA 要你帶住矛盾去旅行?

| WinkyC | 06-07-2016 14:40 | |
RIMOWA 要你帶住矛盾去旅行?

打邊爐要有爐,去旅行要有喼 (行李箱);喼嘅野除咗賣輕、智能鎖同 smooth,仲可以賣咩?德國喼品牌 RIMOWA 推出新喼,喼身內置電子標籤 (Electronic Tag),希望方便用家透過 Apps,就可以完成托運行李的程序。喼都咁高智能,好嘢!之不過,成皮嘢買個高科技智能喼,唔代表可以完全享受電子標籤帶來的方便與好處,因為限制似乎都唔少。ezone.hk 記者一齊同大家睇睇,RIMOWA 呢款新喼可以有幾矛盾。

矛盾一:高科技 vs 低兼容

RIMOWA 今次呢個行李箱,老實講個電子標籤真係型,但想玩到呢個電子標籤,就只能用 iOS 專用 App 去控制,Android 用戶暫時未有得玩。除 iOS 專用 App,用戶如想用電子標籤把行李寄艙,都要配合航空公司指定 App 操作,而現時只有漢莎航空一家航空公司對應。令 RIMOWA 粉絲欣慰的是,廠方話這一系統將會持續擴充,以涵蓋世界各地的航空公司合作夥伴,已知有機會合作的航空公司是聯合航空。

RIMOWA 要你帶住矛盾去旅行?


矛盾二:平 vs 貴

今次 RIMOWA 於多個系列行李箱玩電子標籤,Topas、Topas Titanium、Topas Stealth、Salsa、Salsa Deluxe、Limbo 及 Bossa Nova 行李箱系列,均備有配上 RIMOWA 電子標籤的型號供選擇。要讚嘅係,雖然電子標籤看似高科技而且好有型,但客人只需要在現成行李箱原價多付 $500,即可選擇設有電子標籤的型號,算抵玩。問題又來了,RIMOWA 產品本身個價都唔平,最平都要 $7000 up 一個,大 size 更加上到 5 位數,真係未必捨得買,你話係咪好矛盾先?

矛盾三:方便 vs 唔方便

當你真係用 iPhone,又坐漢莎航空公司,但都唔好以為你就享用到電子標籤的好處。等 ezone.hk 記者講講流程先,首先你要用專用 app 註冊你個 RIMOWA 電子標籤喼,再透過航空公司 app 辦理行李箱託運手續,咁就可以取得數碼登機證及數碼行李資料;之後用手機 click 電子標籤喼的資料,即可以透過藍牙將資料發送到喼身的電子標籤。去到機場,可以搵返 RIMOWA 專屬托運站,完成自助登機,並將行李放上運輸帶,螢幕上就會出現行李重量;萬一行李超重,仲可以自己用信用卡俾錢。過程看似方便?確係唔算複雜,但問題來了,哪來一個 RIMOWA 專屬托運站?官方表示,德國主要機場均有托運站為顧客服務。香港國際機場呢?未有。咁算唔算方便?

RIMOWA 要你帶住矛盾去旅行?

RIMOWA 要你帶住矛盾去旅行?

 

矛盾四:無用 vs 有用

電子標籤說到底其實係一個芒仔,顯示電子標籤堅係靚仔,不過大家睇完上述限制之後,可能都會覺得有少少「得物無所用」。好彩,個芒仔原來可以顯示一般個人資料,就好似平時行李牌一樣作用,叫做爭返唔少分數咁啦!電子 MON 只顯示黑、白、綠三色,外貌同紙製的行李牌幾乎一樣;至於點解係綠色,係因為歐盟海關要求所有從歐洲機場出發的航班,所載行李均必須有綠色條紋。電力方面,用兩粒 AAA 電池,最高可以達到 800 次 transfer;而且佢有特別技術令即使切斷電源後,螢幕上仍然可以顯示最後的畫面,更加慳電。到最後,雖然新行李箱好似限制多多,但老老實實全世界都真係唔少 RIMOWA fans,畀得幾千以至萬幾蚊買喼,加多 $500 升級上電子標籤,哪怕未必有用,「型」就已經足夠了!

RIMOWA 要你帶住矛盾去旅行?

Source:ezone.hk 【專題報道】

Page 1 of 12