雖然現時愈來愈少人沖印相片（曬相），但有時印十張八張回味一番，也是樂事。之前兩集攻略，包括：【淘寶曬相價錢】及【實測淘寶曬相】，已介紹過淘寶曬相的基本詳情及上載相片方法，今集 ezone.hk 記者以同一批數碼相片， 親身到香港的快圖美沖印相片，比併一下。
決鬥一：價錢（淘寶勝）
價錢方面，設有有門市的快圖美當然會比淘寶貴。先說淘寶（以益好旗艦店為例），4R 的柯達相紙，每張只是 0.44 元人民幣，印 10 張只是 4.4 元人民幣(大約 HK$5.2)， 店方提供「大陸國內免郵費」，但都要計埋 10 餘元集運回港的運費 (今次一共曬 20 張相，0.11 KG 重)；至於快圖美，4R 相每張要 $2.1，10 張已經要 $21，不過就可以親身去取相，慳回郵費。 10 張相已經平大約 15 蚊，100 張相自然可平 150 蚊。
決鬥二：曬相方法（快圖美勝）
上文就實測咗【淘寶曬相的上傳方法】，過程都不是順風順水，如果用電郵傳相，隨時要分開多個電郵傳送；若使用大陸雲端儲存空間，一來要開帳戶，二來又會擔心私隱問題。
至於快圖美，始終有實體店，可以親身去辦理，最簡單將數碼相片放入 USB，甚或直接把相機的記憶卡插入至門市的自助服務機，即可以方便選擇相片。另可有個人化設定，例如：白邊、全景出或者印上日期。
決鬥三：取貨速度（快圖美勝）
ezone.hk 記者於 7 月 12 日下午 1 時成功將相片交到淘寶賣家手上，翌日約下午 1 時，賣家已經發貨。但店舖位於山東濟南，約兩天後相片才抵達位於深圳的集運倉， 待處理集運的手續、派送，7 月 19 日終於到達領件的地方。
至於快圖美，若非在「收工時間」才拿相片去沖印，否則一般只需 1 至 2 個小時即可取相。不過快圖美分店唔算太多，如果屋企或者公司附近無，都不算太方便，可能要光顧其他沖印相片店舖了。
決鬥四：質素相紙
沖印相片當然希望有高質素，ezone.hk 記者收到淘寶沖印的相片，單獨看似乎問題不太，不過跟快圖美沖印的相片比較， 就會看到顏色不同。
首先，相紙方面，淘寶我地揀咗柯達相紙；而快圖美就一定係用富士相紙。
淘寶相係運送過程令其中幾張相有起角情況出現。
色彩及細緻度兩者的分別不大，不過快圖美的照片稍稍鮮色點。
人像方面，快圖美的相片明顯較有「血氣」。
看雲層，快圖美的相片比較細緻、立體。
睇完兩者決鬥，大家心目中是否已有定案？選淘寶，還是本地沖印公司呢？提提大家，快圖美「出名貴」，如果屋企附近有一些沖印相片小店，價格多數會比快圖美便宜，那麼跟淘寶的價格差距便會收窄。另外，把相片上傳給淘寶店方，也要自行考慮風險呢！
Source: ezone.hk
【專題報道】