坊間一直流傳的 iPhone 清 RAM 密技，可能有啲用家都已經知道，如果唔知道或者唔知做法係點，就要繼續睇，如果知道更加要睇落去，因為呢個方法只係大家以訛傳訛，並未得到蘋果官方證實，就好似話只要連擊 HOME 鍵兩下，定期關閉已開啟的 apps 可慳電一樣，最近終於有用家 「拚着求知精神」去信蘋果查問究意，結果令大家跌得一地眼鏡碎，亦粉碎咗呢個慳電傳言。咁到底今次呢個清 RAM 密技，又是否純粹炒作，實際上毫無作用呢？
一鍵清 RAM 絕學
好多人都話 iPhone 唔可以好似 Android 咁，可以自行定期清理緩存，釋放記憶體，令部機行得順啲爽啲，之但係原來 iPhone 係可以好似 Android 手機咁，定期進行緩存清理，不過有一點唔同，就係當你按步驟清 RAM 後，你係唔知道究竟有冇清到 RAM，所以都有部分人質疑呢個方法嘅可行性。喺未話俾大家聽 work 唔 work 前，循例都要講下點樣清 RAM，因為可能真係有人用咗好耐 iPhone 都唔知道，其實方法好簡單，就係按住開關鍵大約 5 秒，待進入關機頁面後，就按定 HOME 機唔放，等 iPhone 自動彈番出去主頁就可以了。
清RAM前後大比拼
冇錯，方法就係咁簡單，簡單到根本唔知有冇做過嘢，就算真係清到 RAM，到底清到幾多？Sorry，唔知。為咗實驗吓呢個清 RAM 方法嘅實際效用，小編就裝咗資源管理 app 查證下，一齊睇吓 iPhone 5s（32GB）及 iPhone 6（64GB）嘅結果︰
iPhone 5s
iPhone 6（64GB）
e 評語︰效果因機而異
在進行清 RAM 動作前，兩部 iPhone 分別開啟了接近 30 個應用程式，各自執行記憶體檢查，iPhone 5s 佔用 80% 記憶體，只餘 178MB RAM 可使用；iPhone 6 則佔用了 844MB。清 RAM 完成後，iPhone 5s 增加了約 10% 可使用記憶體；iPhone 6 竟大幅增加 557MB，效果甚為顯著。當然上述結果因應手機所安裝軟件、檔案儲存多寡而異，不過若用家覺得 work 嘅話，不妨定期使用，保持手機流暢；再不是 send 個電郵問吓 Tim Cook 此舉是否真的能夠清 RAM。
Source：ezone.hk