Facebook 被揭發會透過 apps 聽取用戶身邊的聲音，探其私隱，消息一傳出，人心惶惶，因為唔知 Facebook 攞到呢啲 「聲音」 後會做啲乜，更得人驚係 Facebook 完全冇否認，仲大方承認，小編我聽到真係眼都凸埋，要知道 Facebook CEO 劍指中國市場，仲不時向中國賣口乖，一句唔該將 「偷偷埋埋聲音」攞去示好仲得了？！唔想再俾 Facebook 藉住 apps 偷聽，快啲跟住小編喺手機做啲 setting 反竊聽！
iOS 篇
要防止 Facebook 竊聽，方法其實好簡單，就係閂咗 「microphone」 功能，因為要偷聽都要靠收音咪，閂咗呢個功能基本上可以免除後顧之憂。進入手機 setting，揀 「privacy」→「microphone」，如果唔想被偷聽，奉勸唔好諗咁多，直接關閉就可以了，有需要用先開啦！
Android 篇
至於 Android 手機，則比較麻煩，因為要關閉在安裝時已允許的權限，必須要升級至 《Android 6.0》 才行，如非 《Android 6.0》 或以上，則愛莫能助了。若閣下的 Android 手機符合要求，只需進入手機的設定頁，然後揀選 「應用程式」→「Facebook」，點按 「權限」，再關閉內裏 「麥克風」 一項即可。
雙重保險
若用家仍覺得不太安心，可進入 Facebook app 裏面嘅設定，喺 「Sounds」 一欄關閉 「In App Sound」，但呢個其實影響唔大。最實際方法還是好似斯諾登咁講，拆咗個收音咪出嚟，咁就真係一了百了！
Source：ezone.hk