消委會今日搞記招會，公布多項產品的測試報告，最多人關注嘅相信係座地電風扇測試之選。消委會今次 14 個座地電風扇測試樣本中，會以安全表現、送風表現、寧靜程度、省電程度及使用方使程度等方面作出評測，可幸嘅係大部分型號嘅總評都高達 4 分或以上（5 分為滿分），而且經 ezone.hk 格價專員四出格價，最平 $470 就可以將消委會最強座地電風扇帶番屋企，想知今次測試有邊 5 款座地電風扇王，繼續睇落去啦！
交流電風扇類
1）Mitsubishi LV16-GT（總評分：4.5 分）
當中送風表現高達每分鐘 62 立方米，唔只於安全程度取得 5 分滿分，寧靜程度、都取得 4 分，係 14 個測試型號中，交流電風扇組別類評分最高。至於價錢方面，官方價及蘇寧價同為 $940，但一上網格價，驚見最平 $530 有交易！
2）德國寶 EFF-516-RD（總評分：4 分）
EFF-516-RD 同 LV16-GT一樣，於安全程度取得 5 分滿分，寧靜程度取得 4 分，但紅色扇葉外觀則相對時尚、搶鏡，送風表現為每分鐘 48 立方米。至於官方價及網上定價亦有頗大差異，官方價為 $640，而最平網上格價則為 $470。
3）Tefal VF5550（總評分：4 分）
Tefal VF5550 送風表現都高達每分鐘 61 立方米，之不過省電程度及使用方使程度就略遜少少，只有 3.5 分，不及以上兩款出色。至於價錢亦係交流電風扇型號之中第 3 貴嘅款式，官方價及豐澤價為 $738，最平網上格價則為 $559。
直流電風扇類
4）Panasonic F-35TMH（總評分：4.5 分）
直流電風扇之中評分最高為F-35TMH，但 $1,980 嘅官方價格亦屬測試型號之中第 2 貴。值得留意嘅係送風表現為每分鐘 48 立方米，安全程度取得 5 分滿分，不過想買嘅話，記緊先於網上格價，因為最平 $1,396 已可埋單。
5）尚朋堂 DCF-1410（總評分：4.5 分）
DCF-1410 係直流電風扇類型之中售價最平（官方價：$698／最平網上格價：$568），但總評分最高嘅一款，堪稱性價比最強！值得一提嘅係當中送風表現係一眾測試型號最高，高達每分鐘 87 立方米，要求強勁風量嘅朋友，不妨考慮。
宜家天時暑熱，買座地電風扇當然希望送風能力愈高愈好。不過如果家中有小朋友、老人家，喺選擇時也應考慮使用方便程度，好讓全家能夠安心使用。
【
Source: 消委會, ezone.hk
【專題報道】