日本自駕遊｜自由行遊日本，唔少人都會玩自駕遊，自己租車去不同地方，時間更彈性之餘，對於同行親友，尤其是年長或小朋友，亦會較為舒適。不過去日本自駕遊，看似容易，但其實有唔少注意事項，都值得自駕新手留意。ezone.hk 有唔少記者都愛自駕遊日本，以下就分享少少第一身經驗。
自由行遊日本，唔少人都會玩自駕遊，自己租車去不同地方，時間更彈性之餘，對於同行親友，尤其是年長或小朋友，亦會較為舒適。不過去日本自駕遊，看似容易，但其實有唔少注意事項，有唔少港人都曾出事，最好就要做足準備。早前就有為大家介紹過自駕遊必備 Apps，還有不少事項都值得自駕新手留意。ezone.hk 有唔少記者都愛自駕遊日本，以下就分享少少第一身經驗。
日本自駕遊注意事項
日本自駕遊注意事項05-08︰日本自駕遊慳錢｜租車前多做1步免跌錢！揸長途買ExpresswayPass、AEON免費泊車
日本自駕遊注意事項｜01.綠燈轉彎記得睇人又睇車
可能你已經擁有幾十年香港駕車經驗，但去到日本，即使同屬右軚，自駕遊都要小心，尤其在市區燈位。十字路口中，若閣下準備轉左，即使前方是綠燈，當你轉左入彎時，都唔好老定，因為呢個時候，隨時會有行人在「綠公仔」的情況下過緊馬路。你又係綠燈，佢又係綠燈？係呀，其實全球唔少地方都係咁，反而係香港系統太安全。在日本，汽車必須讓行人先行，因此即使你係綠燈轉左，見到行人過緊馬路或即將過馬路，你都要停車待行人過完馬路才可前行。
十字路口想轉右又如何？綠燈轉右你更要睇清楚，因為對頭車「直行」方向同樣是綠燈，你以為綠燈轉右乜都唔理，就會隨時出事！好簡單，大家每次十字路口綠燈轉右時，都當係香港的「袋口位」處理，睇清楚對面方向有無車先好行。
日本自駕遊注意事項｜02.公路無街燈唔出奇
在香港駕車，就算玩到上山頂，都好難搵到一條路係完全無街燈。但去到日本自駕遊，不少國道（一般公路幹線），甚至是自動車道（高速公路）都會無街燈。以較多港人自駕遊的沖繩為例，連接沖繩島南北的國道 58 號，有不少路段都係無街燈。夜晚行車時除要份外小心，必要時要善用高燈。
日本自駕遊注意事項｜03.善用中途休息站
在香港駕車，好少話要中途停低休息，但去到日本自駕遊，尤其是長途車程就記得善用中途休息站，日文稱為「道之驛」。日本的自動車道沿途都有不少「道之驛」，唔單止有基本的洗手間、油站等設施，部分更會有餐廳、手信商店以至觀光台。普遍租車公司提供的 GPS 車機，都會提供「道之驛」情報，假設經自動車道由 A 點去 B 點時，途中經過每一個出口（IC），若該地點設有「道之驛」都會有提示，例如以圖示顯示設施種類等。接近休息站時，按路牌指示即可駛至泊車。以記者最近一次由名古屋市中心駕車上富山為例，車程近 3.5 小時，經東海北陸自動車道行仲會有勁多條又直又長的隧道，中途唔休息真係好難頂兼好危險。
日本自駕遊注意事項｜04.泊車 sensor 欠奉
駕車經燈位要小心，長途車要善用休息站，泊車又有無難題？睇你平時在香港泊車，有無過份依賴泊車 cam 或泊車 sensor 啦！小記幾次去日本自駕遊，唔知係唔好彩定因為租車公司一般都會選用配備較「基本」的車型，租用的汽車都係無泊車感應器 sensor（即係平時泊車會 bebe 聲那種），後泊 cam 當然更加欠奉！如果閣下平時在香港泊車依賴這些科技，去到日本就要望清楚幾塊鏡，亦唔好依賴架車有聲提你「到喇」！必要時，搵同行朋友幫手睇位都係安全上策。
【日本旅遊相關報道】
【汽車相關報道】
Source：ezone.hk