去日本，是港人大愛；住民宿，更是充滿刺激！若然大家唔想因為觸犯到日本潛規則被誤認為不文明嘅遊客？就要留意以下幾點由留日港人寫嘅貼士啦！
1. 將音量收細
日本夜晚住宅區好靜，因為地震防災關係，牆係用木材十分薄。開窗嘅話，普通音量講嘢、行路都好，隔離屋都會聽到聲，所以唔好諗住夜晚係房開 Party。另外，係日本電車巴士車廂、商店、餐廳等地方，睇當地人咁靜，跟住實無錯。大聲講大聲笑，真係隨時被人側目。Whatsapp 語音訊息都同樣，可免則免。
2. 唔好咩都影
日本人好重私隱、肖像權，對偷拍好反感。如果對方係小孩或女性，對方直頭可以大叫「警察叔叔就是這個人！」當然，如果真係想影，至少都問一句先。另外，原來 Game Center，夾公仔機係唔比拍攝架。
3. 廣東話唔係大晒
其實，就算係日本都會有人聽得明廣東話。去到舖頭，大聲用廣東話批評店家商品食物、評論路人樣貌衣著等，真係好冇禮貌。唔止係個邊留學嘅香港、澳門、廣東人聽得明，就算係日本人都可以從熱情目光、豐富表情動作估到你表達緊好嘢定衰嘢。
4. 指定地方吸煙
香港就有室內禁煙，係日本就有指定地方吸煙區。例如成班人上班族企埋一齊食煙嘅地方，餐廳吸煙席，吸煙室等等。
5. 持大型行李唔好搭通勤電車
日本通勤電車真係想像唔到咁恐怖，拎住行李基本上，係冇一絲機會上到通勤電車，所以都係放棄吧。
6. 留意路面情況
香港人生活節奏急速，去到日本就要注意下。唔好急煞、U-Turn、切綫、一字排開、瘋狂撞袋 ... 日本人畀人感覺係好似安全駕駛一樣，有固定行路方法，慢慢來就融入到。
Source：在日香港人 @ Facebook