阿仔呀！個電視機遙控壞左，得閒配番個啦！小編出去問下電視機原裝遙控要幾錢啦！哇，平則 $350，貴則 $500，咁情況，平平地試下萬用遙控有無伏先？小編行過小型電器店，見到掛左好多款電視機萬用遙控器，仲標明唔洗入 Code、唔洗用紅外線對應，入電即用，最緊要係 $58 咋。
舊款萬用遙控器，可能要因應電視品牌、型號，慢慢係萬用遙控說明書搵返對應既 Code 先用到，有一種仲煩，要逐粒功能逐粒功能對應。呢款價值 $58 既 Chunghop 國內萬用遙控，就細分成幾個唔同大牌子電視機遙控。小編用 Philips 電視機，直接買個 Chunghop Philips 專用電視遙控器試下！拆開遙控器，入面無說明書，剩係入兩粒 AAA 電芯，轉台、音量控制、輸入訊號轉換，連下面紅、綠、黃、藍 4 粒顏色鍵都用到，$58 解決到阿媽轉唔到台既問題。抵！
雖然小編實試無伏！不過，購買前最好問清楚，首先唔係個個牌子都有，小編眼見有 SONY、Samsung、LG、Panasonic、Philips、LG 甚至創維、TCL 同海信都有。但小編想幫同事問有無 V Digi 牌子既電視遙控，但無喎！同事我幫你唔到啦！
查詢：www.chunghop.com
Source：ezone.hk