淘寶購物大家可能試得多，從日本網購，包括 Amazon、Yahoo 拍賣、樂天等，經常會遇到賣家不送海外，以及語言不通、匯款等日本網購常見問題，集運及代購行業便因此而出現，但究竟點玩、又有無伏？今次 ezone.hk 小記試俾你睇！
向來「官方野」都俾人貴夾唔抵的感覺，但小記個日本網購達人朋友，就話俾小記聽原來日本 Yahoo 拍賣合作伙伴 Buyee 收費唔算好貴 (一定唔係最平)，而且可以收信用卡俾錢，用落係咁多間代購最方便，於是小記就即管試試，寫呢篇教學同大家分享 (謎之音：如果買嘢可 Claim 公數就好啦！)。此外提提大家，Buyee 在即日至 5 月 31 日做優惠，用 Paypal 可獲 500 日元國際運費；而 DBS 信用卡則在 8 月 31 日前，經銀行網站登記，最多可獲 HK$300 現金回贈。
Step 01 點擊網頁 Banner
登入日本 Yahoo 拍賣網頁後，會發現上方有個廣告寫住「海外買顧客購買請點擊這裡」，狠狠地襟落去就無錯！
Step 02 進入 Buyee 頁面
無論大家是從首頁或者物品分頁點擊 Banner，都會看見已變成 Buyee 頁面，「現在價格」及「直接購買價」會換算成港幣，而拍賣基本資料亦會變成繁體中文。
Step 03 註冊會員
如果睇中件拍賣貨品，只要點擊右上方的「註冊」，輸入基本資料即可建立帳戶。此外，大家要同時輸入付輸方法，Buyee 支援信用卡、支付寶及 Paypal，相當適合港人使用。
Step 04 參與競投
建立帳戶後，大家便可利用 Buyee 系統參與拍賣，點擊〈下標〉即時出價，而〈預約下標〉則在拍定時間出價，最後〈直購價直接購買〉相信大家都一定明白。無論哪一個選項，都會立即從已選擇的支付方法扣數，千萬唔好手多多。
Step 05 檢視結果
最後，只要登入 Buyee 網頁，在帳戶內的「拍賣信息」，便可檢視所有已落 Bid 或直購的產品。
Step 06 等待到貨
如果競投或直購成功，大家只要安待到貨，與賣家溝通、匯款等動作，Buyee 會為大家辦理，手續費為貨價 5%，另加銀行匯款費用 (視乎賣家是否收取)。至於點樣運件貨返港，以及點樣可以慳運費，請留意下篇報導。
Source：ezone.hk