為咗搵份好工，你可以去到幾盡？不過，去得盡都未必一定掂，要方向啱先得。話說 Microsoft 印度就出咗條睇起嚟好簡單嘅幾何問題考應徵者。表面上，題目要求應徵者計算出三角形面積，即係「底乘高除二」，原則上香港嘅初中學生都會識。話晒呢位應徵者都係大學生，梗係覺得好 easy 啦，仲好有信心咁答係 30。當時佢都覺得有小小唔妥，而且考官仲同佢講：「你要不要再計多次？我畀多次機會你！」不過，老實嘅應徵者不虞有詐，仍然堅持自己嘅答案係正確嘅。咁，就出事喇！
睇慣爭家產、後宮爭寵、職場勾心鬥角電視劇嘅香港人，一定識得「邊有咁大隻蛤乸隨街跳」呢個道理，已經好自然咁會用陰謀論角度去睇事物。再加上畀考官拋一拋，本能反應話畀我哋知，事有蹊蹺！原來，考官最後都有講返個正確答案畀應徵者知：圖入面個三角形係唔存在嘅，因為斜邊係 10，對角又要係直角嘅話，三角形高度最多只能係 5。嘩！咁深，邊個識呀？可能考官都預咗應徵者唔識，所以最後仲補充多句：其實呢條問題係想睇吓，應徵者係壓力之下嘅應變能力。
真係好唔好彩，呢位應徵者中咗伏，面試當然亦以失敗告終。不過，佢都將呢件咁不幸嘅事講咗畀個老友 Prashant Bagdia 知，而呢位 Bagdia 就透過當地嘅問答網站 Quora，將呢個寶貴經驗公告天下。有心想入科技巨擘一展所長嘅同學，學科知識要準備充足之餘，古惑野都要知少少，否則就會好容易畀人跣到。
Source：Quora