微軟（Microsoft）喺Windows 11嘅電池顯示方面又有新搞作！喺3月4號嘅Windows Insider計劃網上會議，微軟詳細介紹咗Windows 11電池圖示（Icon）嘅全新升級。原本呢項更新上個月就應該全面推出，但因為臨門一腳發現Bug，所以要推遲。不過，而家終於可以率先睇到呢次更新嘅細節，新設計令人眼前一亮！
新Icon一覽：七種狀態 一眼睇晒
今次電池圖示升級，一口氣推出咗七種唔同嘅樣式，分別對應唔同嘅裝置狀態，包括：
常規模式： 顯示基本電量。
慳電模式： 提醒用家已開啟省電功能。
充電模式： 顯示正在充電。
智能充電模式： 顯示系統正以智能方式充電。
慢速充電警告： 提醒用家充電速度過慢。
低電量警示： 提醒用家電量不足。
未偵測到電池： 顯示系統未能偵測到電池。
相比舊版圖示，新嘅Icon明顯長咗，電量百分比顯示亦都更加清晰。原本喺角落嘅迷你圖示，而家移咗去中間位置，而且尺寸加大咗，更加容易識別。
細節更貼心 功能更實用
除咗外觀上嘅改變，新Icon喺細節設計上都落足功夫。例如，喺充電模式下，圖示中間會顯示一個綠色嘅閃電標誌；而當電量偏低時，圖示會出現一條紅色幼線，提醒用家要盡快充電。
另外，電量進度條採用咗動態漸變效果，可以更直觀咁反映耗電速度，俾用家一眼就睇到部機係咪「食電」。
喺顏色方面，除咗常規狀態下嘅黑白主題色之外，慳電模式下圖示會變成橙色，低電量時會變成紅色，而當充電達到80%時，就會轉為綠色，等用家更容易掌握電量狀況。
Source：快科技