iPhone 8 及 iPhone 8 Plus 於周五（9 月 22 日）正式上市，部分經 Apple Online Store（AOS）網購的買家，有機會於當日收到；而首批經 iReserve 購機的買家，當天亦可於指定時段內到指定 Apple Store 購機。作為炒家的一分子，相信已知道各大「收機佬」不斷唱淡 iPhone 8 回收價。假如你想快快手作頭一批放機賺些少「水腳」的話，就要「識路」放機。ezone.hk 記者根據多年來 iPhone 銷售及炒賣情況，總結以下幾個「搵地方放機」貼士。
貼士一：Apple Store 專門店「即買即劏」
不少炒機新手都會以為去先達放機「無死錯人」，事實上先達確實是收機的集中地，但別要寄望 iPhone 8 回收價會有「驚喜」。想有「驚喜」，iPhone 8 或 iPhone 8 Plus 放機人士可選擇到 Apple Store 門外「搏一搏」，隨時有意外收穫。
ezone.hk 記者訪問過職業炒家小炒王，他表示以往 IFC 及銅鑼灣的 Apple Store 專門店門外及附近地段的「交投十分活躍，不少國內「收機佬」都會即場收機，開價有時會高先達 $50 至 $100。此外，小炒王又指，Apple Store 專門店門外，不時都會有國內旅客想即場買機，如果炒家遇上這些心急「散客」，放機價隨時可以比先達高幾百元呢！
【精選消息】
【精選消息】
貼士二：先達「交易所」
如果不想在街上交易放機，又或者遇不到「靚價」放售，去先達都可以話係「正路」。不過先達收機店舖超多，不論地下、一樓及二樓都有店舖舉牌收機，究竟去邊間放機有著數？老實說，先達收機價都頗為「海鮮」，主要睇舖頭當日的收機目標已否已達到。未收夠開價就會進取一點；收夠機又或者現金不足，自然開「賤價」回收。想知道邊間先達舖開最高回收價，可以話係每小時都唔同，放機人士真係要行完地下，再上一層甚至一兩層問多幾間。
貼士三：面交放機要小心
除先達之外，不少收機佬都會走上各大討論區、Facebook 群組或專頁，表明有意收機。想放機的人，可以私下聯絡收機佬，再自己相約地點面對面交收。這個放機方法有風險嗎？其實等同網上 bid 物品又或私下網購，當面交收時大家都要清楚點收貨品及現金，一手交錢一手交貨是常識。不過溫提大家，港鐵經常嚴打乘客於港鐵站大堂內進行商業活動，想「唔出閘」交收，要注意喇！
Source：ezone.hk