近年物價騰貴，已是常識，連帶結婚擺酒這類人生大事，「入場費」都如「股王」騰訊股價升幅一樣凌厲。有網民最近就出 post 討論最新「人情公價」的行情，可見當年「人情公價 5 嚿」的慣例已成過去式，取而代之的是酒樓價平均 HK$600 至 HK$800，酒店價平均 HK$1,000 至 HK$1,200 的新高點！作為人工「50 年不變」的網民，當然覺得「紅色炸彈」有如「大殺傷力武器」，尤其年尾的擺酒旺季，更是有如核武一樣死傷慘重。之不過，人情還人情，數目要分明，那麼「人情」是否真的要跟住公價，貴一貴都要畀呢？
【精選消息】
【精選消息】
其實結婚擺酒不外乎開心，大家聚首一堂熱烈地恭賀一對新人，何樂而不為？但可惜，近年的婚宴文化就有同軍備競賽一樣，鬥地點、鬥食物、鬥派頭，只要想得到的項目都可以比較一番，因此令不少新人希望「從中賺番筆」，盡量在大龍鳳式的世界級宴會之中「收得一蚊得一蚊」，平衡籌辦婚宴如斯龐大的支出之外，心理上也好過一點。正因如此，因「經營成本上漲」的關係，所以連帶來賓的「入場費」都升到一個點，是會令網民認為「大家唔係咁熟，其實唔使畀咁多」之外，也強調「我理得你擺邊，睇我同你有幾熟嘅姐」！其他網民的看法又如何呢？不如看看他們的留言。
「HK$500，行之有效，沒有檢討必要。」
「對唔住 HK$1200 我就真係唔去啦，除非真係中學 FD 到依家，我可以俾 HK$5000 都冇問題，講真識左十幾年都仲有聯絡，俾多啲都冇問題。錢銀多少其實唔重要。最緊要係你俾得順唔順氣」
「我到今日都唔明點解結婚請人嚟戥你高興竟然要人夾錢」
「千二蚊，唔熟嘅我揀唔去，擺酒要回本究竟邊個諗出嚟」
「唔會再去任何婚宴，無錢呀，唔想對住呢啲不切實際既中國傳統」
「唔使講咁多，熟人就 HK$1500 以上，睇下有幾熟再加。唔熟就 HK$500 酒樓、HK$800 酒店，Hi Auntie 你咪唱衰我」
「熟嘅 HK$1200，唔熟 HK$500，唔好同我講公價幾多，我人工都未升啦，公價升！」
「酒店分級數架喎，例如黃金呢啲山卡拉，食物又垃圾，一千都仁至義盡啦，半島四季就千五都合理。當然最後睇 fd 唔 fd，fd 嘅請我去蝗苦都俾千五」
「我結婚就冇擺酒，費事大家辛苦」
「究竟係邊條好樣諗呢條橋出嚟屈錢㗎？」
Source: hkgolden