唔少 iPad 用戶都會加購觸控筆，繪圖、手寫筆記時就更方便。除咗 Apple Pencil，市面上亦有各式各樣牌子嘅 iPad 觸控筆；咁多選擇，到底點揀好？今次 ezone.hk 就為大家比拼 Apple Pencil 2 代同 USB-C 版，仲有 Xpower 主動式觸控筆，價錢港幣 200 蚊都唔洗。事不宜遲，即刻進行大比拼啦！
即刻【按此】，用 App 睇更多產品開箱影片
【iPad 觸控筆 2024】Apple Pencil 2 代
首先實測嘅就係 Apple Pencil 2 代，售價 HK$999。充電方式非常方便，內部有磁石，只要靠近 iPad 就會自動吸上去開始配對充電。就到農曆新年，我哋一於試下用 iPad Pro 寫揮春啦！Apple Pencil 2 代握感有啲似六角鉛筆，寫字嘅時候都幾順手，而且精準度達至像素級，延遲時間極短，有斜度同力度感應，繪圖手寫表現同樣出色，具備支援兩下輕點、不用放下筆即可轉用不同工具。雖然 Apple Pencil 2 代差唔多要成千蚊，但功能上比較全面，如果對專業繪圖有高要求嘅用戶就啱晒喇！
【iPad 觸控筆 2024】Apple Pencil USB-C
跟住落嚟實測 Apple Pencil USB-C，體積及重量都比 Apple Pencil 1 代及 2 代輕，售價亦更平，只係 HK$619。雖然唔支援無綫配對充電，但只要推開筆上滑蓋，就可以用 USB-C 綫充電，相當方便。用 Apple Pencil USB-C 版繪圖寫字嗰陣，平衡度及手感唔錯，不過刪減咗壓力感應，同埋不能像 Apple Pencil 2 代支援 Double Tap 切換工具，畫筆切換較為麻煩。觸控流暢、精細度比 Apple Pencil 2 代差少少，但筆尖書寫時， USB-C 版幾乎沒有任何 latency 遲延，而且定位準，當作一般書寫工具都算夠用。
【iPad 觸控筆 2024】Xpower 阿婆主動式觸控筆
比拼完 Apple Pencil，一於實測埋 Xpower 嘅主動式觸控筆，只係 Apple Pencil USB-C 版 3 份 1 價錢，售價港幣 $199。佢係 Xpower 與大麻成系列推出嘅 Crossover 產品，用上 Whatsapp Sticker 大熱的阿婆走得快主角。可透過磁吸功能，吸在 iPad 機身，但磁吸功能就唔支援配對同充電，同Apple Pencil USB-C 一樣以 USB-C 充電，不過續航力就只有 10 小時，比 Apple Pencil 耗電較快。觸控筆筆頂有一個觸控式功能鍵，主要是作開關及配對用途，透過藍牙連接 iPad，便能在屏幕上進行書寫及繪圖，價錢夠晒平之餘，定位相當準確，連續書寫亦算流暢，仲支援傾斜書寫功能、防手掌誤觸。至於壓力感應就真係麻麻地，觸控流暢、精細度明顯差過晒 Apple Pencil 系列。不過 Xpower 主動式觸控筆勝在夠平，而且可以兼容 2018 年後嘅 iPad 各大型號，用作一般書寫嘅話，相信係性價比之選。
實測比拼完 3 款 iPad 觸控筆，唔知大家覺得點呢？選購 Apple Pencil 前，除咗要考慮自己嘅用途需要，記得都要先留意 iPad 型號呀！最後 ezone.hk 都預祝大家新年快樂，龍年行大運！
【相關報道】
Source： ezone.hk