香港航空日前推出名為「一人盡情飛」套票，以 HK$19,999 的價格提供最多 510 套機票，於 2019 年 3 月 31 日前，任你來回日本 8 個航點及南韓首爾。聽落好筍，但實際上係咪抵？有旅行社就公布更多細節，ezone.hk 同大家計計數。
一買即出 10 套機票
大家要 2018 年 3 月 31 日或之前完成訂購及出票手續，HK$19,999 任搭經濟客位，HK$45,999 任搭商務客位。當大家訂購時，須同時用「一人盡情飛」套票出 10 套來回機票，並選定日子及航點，及繳付相應的機場稅等。
【遊日消息】日本2019 年起徵收觀光稅！出境收取1000 円
之前睇廣告見「免費更改出發日子」，唔好以為出咗票唔使擔心任你改，因為只係香港航空公司免費俾你改，但「一人盡情飛」套票，必須經旅行社處理，有售此套票的東瀛遊，就於網上列出相關細則，第一次更改日期或目的地，東瀛遊須收取每張 HK$50 手續費，其後同一張來回機票再改就要收每張 HK$300 手續費。
如果出咗機票唔機得，No-show 就仲貴！香港航空的 No-show 收費為每次 $800，而東瀛遊又會收 HK$300。
好「伏」在後頭
首 10 套機票，會比較易出，因為 Booking Class 係較高 Priority 嘅 L Class (經濟客位) / D Class (商務客位)，機票有效期為 0 日至 1 個月，玩即日來回都無問題。但由第 11 套開始，機票有效期係 2 至 14 日，即係已經變成較低 Priority 嘅 Booking Class，ezone.hk 記者就問過東瀛遊熱線職員，話未知 Booking Class，要由佢地交咗目的地、出發及回程日期，等香港航空覆有無位後先會知道。
去到呢個位，記者就有個疑問，因為第 11 套機票開始，已經唔可以玩即日來回，最少要留 3 日 2 夜，咁又點會出倒 510 套機票？另外，由第 11 張機票起，訂每套機票都要大約 3 個工作天辦理，需要改期、改航點或者 No-Show 嘅手續費，都同首 10 張機票一樣，但留意返，張機票已經變咗較低 Priority 嘅 Booking Class，未必改倒心水出發日期喎！
Weekend 旺季遊都抵
不過，大家如果 Confirm 倒未來 1 年嘅假期，出倒復活節、暑假、中秋、聖誕、元誕、農曆新年機票，連多幾套 Weekend 機票，每套當係 HK$2,000 來回都唔貴。只係第 11 套機票起難唔難 Book，真係要搵勇士實測先至知。
Source：ezone.hk、東瀛遊