黃子華棟篤笑曲終人散，65 歲獨力撫養兩個兒子的紅館清潔工人阿雪因此失業？是咁的，早前黃子華在紅館舉行棟篤笑 talk show 期間，有晚紅館清潔工人阿雪見到廁所好骯髒，不禁呻了一句「今晚啲 fans 都唔乖」，卻被在廁所排隊等候的一位女觀眾聽在耳裡，女觀眾指責清潔阿姐，隨後更向紅館投訴。結果，在黃子華棟篤笑 talk show 結束後，清潔阿雪被外判公司停職，以後冇得再返紅館洗廁所喇！
觀眾投訴清潔阿姐
Facebook 專頁「職工盟(HKCTU)」日前發帖，題為「【睇 show 還睇 show，投訴咩啫】」。職工盟小編嬲嬲，文首就怒吼：「你一個無理投訴，搞到人哋無咗份工呀﹗」。
【精選消息】
職小編：「上個月黃子華棟篤笑開咗二十幾場，觀眾笑到見牙唔見眼，不過背後就有人流眼淚。」邊個流淚呀？
廁所變水塘 阿姐心惶惶
職小編爆料：「話說 7 月 15 日個場棟篤笑，清潔姐姐阿雪如常洗廁所，不過個晚廁所特別污糟，個頭洗完，一陣就成地尿迹，而散場十分鐘之後，發現其中一格廁格又俾人整到勁污嘈，格廁所差唔多變成個水塘。」
職小編引述清潔姐姐阿雪表示：「又搞到咁污糟，痾到成地都係，今晚啲 fans 都唔乖」，之後繼續清潔。
【精選消息】
阿姐都有情緒…
據了解，當時一名正在排隊等去廁所的觀眾聽在耳裡，遂指住清潔姐姐阿雪罵：「咁冇禮貌，唔鍾意做咪唔好做囉」！阿雪心知不妙，立即解釋只係隨口講句，唔是鬧佢，惟該名觀眾乘勢狙擊：「把口咁賤，抵你一世做呢啲工啦。」
「妳以後唔使返工喇」
該名觀眾更向紅館投訴，紅館經理要求清潔姐姐阿雪寫信解釋，阿雪亦在信中道歉，並且繼續上班，清潔紅館。豈料，當黃子華 talk show 於 7 月底謝幕後，外判公司主管向阿雪表示「妳唔使返工喇」，理由係「紅館上面話以後唔洗你返」。
據了解，時薪 HK$36 的兼職清潔工人阿雪並未被解僱，惟已遭停職，不用返紅館清潔。職工盟正全力協助阿雪，去信康文署要求解釋，為阿雪爭取復工。紅館正向外判清潔公司了解詳情。
至於阿雪嘛，職工盟表示佢兩個兒子已很大，又有穩定收入，阿雪根本就冇經濟壓力。原來阿雪只係想討回公道：「我都係想爭番啖氣，如果冇我地呢班人，都唔知個環境會變到幾污糟，我唔想清潔工俾人鬧又賤又 cheap。」
【精選消息】
對於紅館阿雪的遭遇，網民紛紛派嬲，同情阿雪。網民留言，節錄如下：
- 一定喺投訴個位賤種攪嘅，因為佢針拮到肉就知痛
- 連解釋都唔聽，紅館好過份！
- 就息事寧人，炒個細來交代事件，而繼而令到投訢文化大增，有乜事投訢咗先，投訢成功咬著數，無理投訢又無花費，咪係又投，唔咪又投囉！
- 所以我最憎人胢到厠所周維都係屎尿，尤其琴上馬桶當痞廁用果 d。我係女人都係甘話，好多女人表面乾淨企理，但去廁所，為左自己衞生，攪到成個廁所都唔衞生
- 黃子華唔該話吓你 D 投訴 L fans 啦
- 甘多大陸人睇黃子華，當然會呵到地下有尿
- 垃圾黃，出來調查一下。正剩吸金
- 其實咁大個人屙尿屙屎都搞到周圍係嘅人係咪應該檢討吓？
Source：Facebook@職工盟(HKCTU), hket