中國大媽與香港人彷彿水溝油，難以共融。有中國大媽出沒的地方，香港人總會團結一致，槍頭對外。中國大媽真的如此這般神憎鬼厭？面對大媽，港人又是否一定同聲同氣？未必。Facebook 專頁「空中飛傭 The Flying Maid」日前發帖，題為「【大媽艾笠腰！！！！！！】」。帖子開首就表示：「對於空中飛傭（編按：空中服務員，即所謂的空姐空少）嚟講，最鍾意嘅客並唔係同聲同氣嘅香港人，啱啱相反，Number 1 最愛竟然係好鍾意跳廣場嘅大媽！！！！！典解嘅？！？！？！！？！？」空姐空少居然高叫「大媽艾笠腰」，更以親身經歷，從 5 大方面包括：守規矩、無理要求、易話為、少投訴、態度友善，比較引證香港乘客如何討厭與大媽乘客怎樣可愛。真係咁堅？即 check！
1. 遵守規矩好聽話
港客：叫扣安全帶，港客會爭論：「點解我要扣呀？」
大媽：好多都係第一次搭飛機，唔守規矩只因唔識，你一嗌，大媽會立即聽話做好，仲會道歉。
樓主：「好多大媽都係第一次搭飛機，好多時見到佢哋可能連開個廁所門、邊度撳掣沖廁都唔識；又或者，seat-belt sign on 都會企起身……如果你覺得佢哋咁樣樣好難控制，咁你就大錯特錯鳥。雖然佢哋好多嘢都唔曉，但其實你一嗌，佢哋就會即刻同你做返好（例如起飛時扣好安全帶），佢哋唔做只係因為唔識。有時話畀佢哋知唔啱嘅，仲會同你講：「對不起／不好意思。」好尊重你作為空服員嘅身份。反正，試過叫香港人好簡單咁扣好安全帶，佢都會同你爭論一番：「點解我要扣呀？」」
【精選消息】
2. 唔會有黑洞般無止境嘅要求
港客：遇上嗜酒「西人」，可能每隔 20 分鐘就撳掣要你攞酒。
大媽：大媽排隊只係要熱水，暖咗個身就會瞓，瞓醒玩雜耍，就係咁簡單。
樓主：「一上到機，最常見就係一堆大媽隊一堆熱水樽叫你斟熱水，總之無論飲咩都一律要熱，但其實只要你畀到熱嘢飲佢哋，佢哋飲暖個身，就好少會要求其他嘢，食完飯就會乖乖地瞓覺或者瞓完起身做下雜耍。相反，如果遇著鍾意飲酒嘅西人，每隔 20 分鐘撳你出去問你攞 vokda，成程機你唔洗抖都似。」
3. 唔會扭計易話為
港客：食飛機餐，如果派晒冇得選擇，港客可能扭計。
大媽：食飛機餐，大媽鍾意食米飯，冇晒咪叫其它囉！
樓主：「遇到大媽，雖然佢哋好鍾意食米飯，但就算派餐無 choice，只要你講句隊 bu 池，再問佢食第二個得唔得，一般都好易話為。如果遇正係香港人，未派到佢之前你就要諗定點執生喇……」
【精選消息】
4. 甚少投訴或搲著數
港客：小小損失，小題大造。
大媽：只要好好溝通，即使遇上事情不順心，大媽都不會搵你祭旗。
樓主：「就算遇到唔順心嘅事，大媽就唔會以你為敵，攞你出嚟祭旗；只要好好溝通，畀佢哋理解到你嘅處境，佢哋一般都好易話為，好快冇咗件事。相反，香港人會覺得自己好識個遊戲點玩，小小損失都會小題大造爭取補償。我遇到有同聲同氣嘅香港人，因為幾次遇上氣流而無辦法畀到熱咖啡佢，於是就扯住我同事個名牌問佢咩名，好似要置諸人哋死地，人哋唔冇咗份工佢冇唔安樂咁。」
5. 態度友善和藹可親
港客：落機講拜拜，港人當你透明。
大媽：落機講拜拜，大媽好熱情，可能講：「辛苦了」。
樓主：「每次落機，你同佢哋講拜拜，佢哋一定會微笑住回應你，有啲大媽仲會好熱情咁同你講：「辛苦了～」開口埋口：「小伙子～」「謝謝喔～」，真係會令你心頭即刻為之一暖。相反，香港人嘅話，多數都係當你透明咁，直行直過。」
樓主在帖子文末再次表態，豪言：「做過服務業之後，你就會發覺，大媽真係好可愛，你會對佢哋愛不釋手。Sorry！並唔係同聲同氣嘅香港人呀！」
【精選消息】
在一片反大媽潮流下，撐大媽帖子自然相當惹火。截稿前，帖子贏得 1,403 個 emoji 心情、111 個回應、92 次分享。意外地，不少網民對樓主表示理解，似乎港客都有很多不受歡迎的地方，反之大媽真係有可愛的一方，哎喲，不錯啊！。網民留言，節錄如下：
- 我無去到 Love 大媽呢個程度。我覺得傭仔想講返而家香港客人同大陸客人對服務人員態度分別姐。我都好唔鐘意香港日日有咁多大陸人落嚟爭資源一街都係。但做服務行業嘅鐘意 Serve 大陸人多過香港人又係不爭嘅事實(唔關消費能力事）。感覺上大陸人少麻煩過香港人咁囉。咁如果你自問自己對服務人員好好，自問係好人就無需對號入座囉。就好似喺廁所痾慣屎嘅大陸人，唔會_9（文字經過處理）你班香港人話 9 佢班係地鐵站痾屎嘅大陸人同胞一樣。因為人地唔係話緊你呀嘛。如果香港回到 20 年前，大陸人唔係點落嚟，香港人可能會少 D 怨氣，少 D 燥底，西客都唔會有咁多……掛。
- 其實香港地方細人多 衝突多 因為安全區細 呢個係心理學行為 飛機嘅空間細 所以磨擦都多 投訢好玩野好呢 D 係防禦系統用過 work 雙方咪繼續用 lor 講嘅地方細小國家人都有呢種因素 外國人國家大 D 得兩種 你點都唔會採你 或者已經郁手 呢 D 全部係人嘅陰暗面 亦都係負面處理方法-punishment 如果 tune 到用 positive 方式應該會好 D 情況好似對 bully 同 discrimination 一樣
- 香港人唔守規矩根本去到「天性」級別，每每都認為服務業應該順佢意思去玩。「今時今日咁既服務唔夠架」
- 香港文化係咁 啲人覺得自己愈麻煩就好似愈高貴 仲突顯到自己好似成日搭飛機 好有經驗同好有道理咁 總之係唔鍾意妥協 係要攪屎攪棍先覺得自己“特別”
- 以前過時過節做海洋公園入場巴士維持秩序，香港人同大陸人都會搏睇唔到打尖，當你喝佢唔好打尖既時候，後者會乖乖地排返後面，前者會同你拗話佢唔係打尖再投訴你態度唔好
- 呢樣我信,大陸客係煩,但大媽類反而會好啲,但呀叔同八婆另計,至於點為之大媽係有樣睇,大鄉里唔太識野唔太敢亂黎個啲,但數量太少,麻煩既仲多
Source：空中飛傭 The Flying Maid