一則題為「點解大多數的香港公屋家庭會窮足三代唔係無原因」的帖文在網上熱議，樓主以自身經歷，細數公屋家庭成長的種種困境，直指父母「用最低成本養大仔女，然後搏佢成為人中之龍」的養育方式，是導致「公屋家庭窮三代」的根源。
樓主在帖文中描繪了一個令人唏噓的成長故事：五歲時利是錢被母親「保管」、七歲時想學琴被斥責「有錢人先玩」、十二歲時想向父親請教功課卻被打發「唔好阻住佢賭馬」、十六歲時想補習卻被父親以「我以前讀書使鬼補咩」為由拒絕……種種經歷，令樓主不禁感嘆：「俾人由細搾壓到大」。
這篇帖文引起了廣大網民的共鳴，不少人表示樓主的經歷「簡直係童年陰影」，更有網民分享自己類似的遭遇。
「簡直係童年陰影」
樓主指出：「我估以上最少有一半係公屋仔女嘅寫照，俾人由細搾壓到大。有啲人已經無咩知覺，覺得用錢塞住佢把口就算。但呢啲簡直係我童年陰影，成日發惡夢都係呢啲片段」。
然而，帖文中最引人注目的，是樓主在文末分享的七招「發圍密技」！
7 招發圍拒墜無間地獄
在帖子文末，樓主「利申」自爆 7 招發圍密技，誓要逃離「公屋窮三代」無間地獄。
然而唔知是咪樓主太 "inch"，網民不屑直斥；「個利申同個故都唔啱嘅，你入 band1 嗰刻已經走緊同好多人唔同嘅路」、「bba asso 上網查下第一個 b 係咩意思啦，仲話自己讀 kongu」、「又係呢 d 老生常談，爭氣 d 啦垃圾」，遭樓主駁斥：「兩秒就睇完？你又知我唔爭氣」。
即刻【按此】，用 App 睇更多產品開箱影片
「點解大多數的香港公屋家庭會窮足三代唔係無原因」原文
因為由你細細個開始
已經有一套套路
用最低成本去養大自己個仔女
然後搏佢成為人中之龍
喺你 5 歲有認知嘅時候收到第一封利是
你好開心 然後老母一手搶_左
同你講 阿仔 等媽咪幫你儲起佢
你信以為真
喺你 7 歲嘅時候入左間屋邨小學
偶爾放學經過小琴行見到部鋼琴好靚
返到屋企問下媽咪可唔可以學琴
老母同你講 鋼琴呢啲有錢人先玩
細路仔只係會讀書㗎
唔好學埋曬啲無謂野啦
悶就落街打波啦
於是你落街識左一班豬朋狗友
喺你 12 歲嘅時候要考呈分試
老豆日日叫你去溫書
如果唔係就好似佢咁窮
養唔到老豆老母㗎啦
自以為懂事嘅你
覺得要為屋企做返啲野
但打開本書你無從入手
你問老豆呢條數點計
佢叫你唔好阻住佢賭馬
只好自己死記硬背
13 歲嘅你入左一間 band2 屋邨中學
當你開始要問老母攞飯錢
佢竟然同你講 1 日只會俾 20 蚊
你同佢講話學校出面食 40 蚊一餐
佢叫你食學校 20 蚊劣飯
16 歲你準備要考 dse
你去完 hku oday 發現大學生活好似好美好
渾渾噩噩讀左 15 年先發現自己無讀過書
你急起直追 有次經過燈塔見到一車車名校生走出黎
你知道考試係有捷徑 於是問呀爸攞錢補習
呀爸同你講
_ 我以前讀書使鬼補咩
而佢忘記左自己嘅職業係一名保安
18 歲放榜當日 你得到了 433333
你含淚去報 bba asso
結果你辛苦左兩年入返正式大學
你急不及待想去玩玩時先知道
入面全部英文叻過你 有才華過你
group project 無人同你組
intern 都係靠關係 / 爆 gpa 先有份玩
22 歲畢業時候
你搵到份 1xk 起薪嘅工
回首一望屋企人完全無 support 過你
當你同佢攤牌佢又話你不孝
仲叫你準時俾 8k 家用
基於責任同無膽你又唔敢唔俾
結果公屋又排唔到
搬又搬唔到出去住
日日就係咁俾老豆老母_
完
我估以上最少有一半係公屋仔女嘅寫照
俾人由細搾壓到大
有啲人已經無咩知覺
覺得用錢塞住佢把口就算
但呢啲簡直係我童年陰影
成日發惡夢都係呢啲片段
利申
爛仔小學 -6 入左 band1
自己偷老母錢 + 利是錢補習
俾我碌左入 hku
呢家每年問政府借足 non-mean grant-loan
定期返下工
一畢業應該儲到 15 萬
然後即刻搬出去住
工廈又好 劏房都好
已經講明以後只會俾 $20x30 家用
Source：topick