婆媳關係可能是世上最複雜的一種人際關係。「BB 來了」也許只是導火線，婆媳之道根本就是水火不容？大家都係女人，點解咁多紛爭？最新研究發現，婆媳糾紛的源頭可能是夾在中間的一個男人。「同住奶奶好惡頂」Facebook 專頁日前發帖，帖子題為「生完 bb 討厭老爺奶奶」，一名港媽剖白在坐月期間，與老爺奶奶相處發生的 7 大問題。然而，有網民突破盲腸，表示問題不在老爺奶奶，最錯原來是老公？
港媽在文首問大家，生育後會否特別討厭老爺奶奶？她先戴頭盔，強調老爺奶奶是好人，對自己好；惟文化差距，「我老公又唔識溝通，成日比錯料我」，因此偶有誤會。幸不是同住，見面食飯，彼此客氣。可是當港媽生育後，「覺得佢哋好煩好討厭」。以下歸納港媽投訴老爺奶奶的 7 宗罪！
1】分娩後安排親戚探訪
港媽在醫院分娩後，又肥又腫，多多嘢煩，超唔想見人。可是老爺奶奶「安排唔熟嘅親戚探訪」。老公又唔幫自己，更「一句頂埋嚟，話佢哋嚟探 b, 又唔係探你，仲咩唔比人嚟，我真係冇聲出」。
2】斥 bb 床墊唔好；老爺教埋身餵奶
港媽坐月攰到死，卻仍要應酬常來探 b 的老爺奶奶，更是常「好熱心」抱住 bb 唔放，港媽要餵奶，老爺奶奶都唔走開。
港媽驚爆：「我老公仲催我餵快 d 等佢哋可以玩孫，總之上嚟咁耐就攪住阿 b 咁耐，講嚟講去都係阿 b 個面相生成點，冇其他話題，100%專注在 bb 的所有細微細眼嘅嘢上」。
她又不滿老爺奶奶：「比好多意見，好似話我張 bb 床墊唔好，會整親 bb 個頭（其實個床墊攞晒獎，根據人工力學超好評）」，又指老爺教她埋身餵奶的「正確方法」，真係滴汗，奶奶則叫港媽坐地下餵奶云云。
3】唔比擺滿月酒
港媽想擺 bb 滿月酒，讓兩家人食飯慶祝，可是奶奶「話人多易有菌，如果我哋擺，佢會抱 bb 出去出面」。港媽勁唔開心，直指「唔係一定要在酒樓擺，要防止病菌，可以去其他地方開個小 party 都等得，唔係一句話要抱走我個 bb 囉」！
港媽呻冤：「雖然我知佢係錫個孫，但我先係阿媽，我又唔係咩都唔識，我有陪月，有上 course 有睇書，甚至我的工作都同幼兒有關，我真係幾唔鍾意佢哋成日擺個專家樣出來教我，又幫我做埋決定」。
4】老公最想奶奶湊 b
港媽提到有次與老公爭執：「我想出去抖氣，我老公即刻話我一出去佢就叫佢阿媽來湊」，港媽對此非常不悅，感覺是老公隨時可以搵奶奶來 replace 自己。
港媽又指老公「成日都想佢阿媽來幫手，佢初時唔想請陪月，滿月後唔又想請鐘點幫手，成日想搵奶奶幫手，諗住慳錢」，然而港媽寧願頭幾年唔返工都想自己一手一腳湊，到 bb 返學先放手比屋企人帶。她反思：「叫我奶奶幫手，唔通我叫佢幫我洗衫晾衫洗奶樽，我坐喺度同個 bb 玩咩，咪又係我做清潔佢玩 bb」。
港媽懷疑自己產後抑鬱：「每次我見到佢哋一家三口同我個 bb 玩，講晒佢哋嘅家鄉話，又叫我唔使湊，去做自己嘢，我心裡很不是味兒，覺得自己勁被排外」。
5】奶奶湊 b 資訊來自三姑六婆
港媽自我分析，認為自己對老爺奶奶的不滿，多少是來自老公。她指老公「成日質疑我湊 bb 的方法，成日覺得佢阿媽先係最啱，成日想佢阿媽參與，我覺得，個 bb 係我哋嘅，我哋有困難，應該先自己試咗先再搵辦法，始終個 bb 係自己嘅，我點都要學識點湊，交比其他人湊，我永遠都唔會學識」。
港媽直指奶奶的湊仔知識來自數十年前，又唔肯上陪月班，湊仔資訊來自三姑六婆；「我都唔係好放心比佢帶，而且佢教佢自己的仔女都唔算好，睇得出係好寵愛嗰隻，可以想像到佢哋寵個孫會更嚴重」。
6】日抱夜抱 搞到 bb 識扭抱
港媽想突圍：「之後呢幾個月，我唔理佢哋專心自己湊，但每次帶 bb 去見佢哋，都會搞亂晒 bb 的 schedule, 佢哋成日抱阿 b, 好哋哋瞓咗喺架車度又要抱起來，我知佢哋好鍾意 bb，但真係太誇張， 日間邊行邊抱，係都要抱到 bb 瞓著都唔放低，搞到 bb 夜晚唔肯瞓，開始識扭抱。」
7】bb 喊都冇機會氹
老爺奶奶也許實在太鍾意 bb，老爺奶奶要輪住抱，本來已心情麻麻的 bb 即刻大喊，惜老爺奶奶又唔肯「歸還 bb」。港媽想到大叫「要餵奶」先搶得返，可是港媽入房餵，老爺奶奶小姑輪住入嚟睇。
港媽：「我都冇機會氹掂 bb 唔喊，奶奶就話，等嫲嫲抱就唔喊喇，又搶返走，我好唔開心，講到好似我唔識湊搞唔掂阿 b 咁，正常 bb 喊都會比返人地媽媽抱啦，bb 要安全感嘛，佢好似想証明自己好叻咁，之後奶奶搞唔掂，比咗我老公抱，bb 唔喊，佢就話都係爸爸先搞得掂，我聽完又係勁唔開心，好似係都要話我唔掂咁，排我在外」。
港媽千字文發洩了，在文末表示心情都好返；並再次自省是否太小器，或太敏感：「但當同佢哋一齊時，就會莫名其妙的唔開心，我都唔肯定係咪我產後抑鬱，還是其他新手媽媽都會介意？ 其他長輩同我 bb 一起時，我唔會有嗰種被入侵的討厭感覺」。
網民狠批：港媽老公正廢柴
不少網民把婆媳糾紛的茅頭指向老公：「個老公係正宗癈柴一名，遲早比嚟班人攪到你有 抑鬱,你自己一定要企硬，唔滿意一定要出聲。」、「其實個重點係你老公，唔係老爺奶奶」、「嫁錯老公系列」、「妳老公太唔體諒你了。我地男人在這方面太不懂感同身受。妳叫佢新車第一日落地，就要借比妳老豆落雨天去泥塘行山。佢就會較易明白妳的感受了」。
生完 bb 討厭老爺奶奶 原文
(177) 新抱 Inbox - [生完 bb 討厭老爺奶奶]
我想問下，係咪生完 bb，會特別覺得 6299 討厭㗎?
老實講我 6299 都係好人，對我都好好，只是文化差距，我老公又唔識溝通，成日比錯料我，所以間中有誤會，但不算嚴重，而且又不是同住，見下面食下飯大家都客客氣氣。
但自從我生咗 bb 之後，我覺得佢哋好煩好討厭，首先係在醫院時，佢哋安排唔熟嘅親戚探訪，我生完之後又肥又腫又殘，好多嘢煩，超唔想見人，但老公一句頂埋嚟，話佢哋嚟探 b, 又唔係探你，仲咩唔比人嚟，我真係冇聲出，之後坐月時佢哋又成日要上嚟探 b，我攰到死都要應酬，好辛苦，佢哋一上嚟就好熱心 ，抱住 bb 唔放，我要餵奶都唔走開，我老公仲催我餵快 d 等佢哋可以玩孫，總之上嚟咁耐就攪住阿 b 咁耐，講嚟講去都係阿 b 個面相生成點，冇其他話題，100% 專注在 bb 的所有細微細眼嘅嘢上，又比好多意見，好似話我張 bb 床墊唔好，會整親 bb 個頭(其實個床墊攞晒獎，根據人工力學超好評)，62 仲教我埋身餵奶的“正確方法”，真係滴汗，99 叫我坐地下餵奶…
又唔比我擺滿月，我只係想兩家人包間房仔食餐飯，慶祝下，佢話人多易有菌，如果我哋擺，佢會抱 bb 出去出面，我聽到勁唔開心，我唔係一定要在酒樓擺，要防止病菌，可以去其他地方開個小 party 都等得，唔係一句話要抱走我個 bb 囉，雖然我知佢係錫個孫，但我先係阿媽，我又唔係咩都唔識，我有陪月，有上 course 有睇書，甚至我的工作都同幼兒有關，我真係幾唔鍾意佢哋成日擺個專家樣出來教我，又幫我做埋決定。
之後有次我同我老公有拗撬，我想出去抖氣，我老公即刻話我一出去佢就叫佢阿媽來湊，我又係勁唔鍾意，感覺好似我走咗隨時都有佢阿媽來 replace 我咁，我老公成日都想佢阿媽來幫手，佢初時唔想請陪月，滿月後唔又想請鐘點幫手，成日想搵 99 幫手，諗住慳錢，但我真係超唔想，我寧願頭幾年唔返工都想自己一手一腳湊，到 bb 返學先放手比屋企人帶，叫我 99 幫手，唔通我叫佢幫我洗衫晾衫洗奶樽，我坐喺度同個 bb 玩咩，咪又係我做清潔佢玩 bb，我唔知係咪產後抑鬱，每次我見到佢哋一家三口同我個 bb 玩，講晒佢哋嘅家鄉話，又叫我唔使湊，去做自己嘢，我心裡很不是味兒，覺得自己勁被排外，雖然我成日都提自己要正面 d 諗，佢哋可能真係想幫我手，想我抖下，但唔知點解，就係勁唔鍾意。
我諗我對 6299 的不滿多少來自我老公，佢成日質疑我湊 bb 的方法，成日覺得佢阿媽先係最啱，成日想佢阿媽參與，我覺得，個 bb 係我哋嘅，我哋有困難，應該先自己試咗先再搵辦法，始終個 bb 係自己嘅，我點都要學識點湊，交比其他人湊，我永遠都唔會學識，事實上佢阿媽的湊仔知識都幾廿年前嘅，叫佢去上下陪月班又唔去，資訊來自三姑六婆，我都唔係好放心比佢帶，而且佢教佢自己的仔女都唔算好，睇得出係好寵愛嗰隻，可以想像到佢哋寵個孫會更嚴重。
之後呢幾個月，我唔理佢哋專心自己湊，但每次帶 bb 去見佢哋，都會搞亂晒 bb 的 schedule, 佢哋成日抱阿 b, 好哋哋瞓咗喺架車度又要抱起來，我知佢哋好鍾意 bb，但真係太誇張， 日間邊行邊抱，係都要抱到 bb 瞓著都唔放低，搞到 bb 夜晚唔肯瞓，開始識扭抱，最近一次，阿 b 去 99 度之前已經有點心情麻麻，一去到，6299 又要輪住抱，bb 即刻大喊，6299 又唔肯比返我，我話要餵奶先搶得返，我話入房埋身餵，6299 小姑輪住入嚟睇，我都冇機會氹掂 bb 唔喊，99 就話，等嫲嫲抱就唔喊喇，又搶返走，我好唔開心，講到好似我唔識湊搞唔掂阿 b 咁，正常 bb 喊都會比返人地媽媽抱啦，bb 要安全感嘛，佢好似想証明自己好叻咁，之後 99 搞唔掂，比咗我老公抱，bb 唔喊，佢就話都係爸爸先搞得掂，我聽完又係勁唔開心，好似係都要話我唔掂咁，排我在外。
當然，現在打呢篇嘢出來時，心情都好返，平心來講，其實佢哋冇做過咩唔啱，我獨自一人時，都會怪自己會唔會太小器，或太敏感，但當同佢哋一齊時，就會莫名其妙的唔開心，我都唔肯定係咪我產後抑鬱，還是其他新手媽媽都會介意？ 其他長輩同我 bb 一起時，我唔會有嗰種被入侵的討厭感覺
【精選消息】
【精選消息】
Source：同住奶奶好惡頂