雖然人們常說拍拖只是兩個人的事，但世事總不如想像中理想，可能大家生活中都會聽到不少「女朋友個 friend 從中作梗」，出言教訓男朋友，甚至間接促成分手的事件。最近有位巴打真正深受其害，更出長文 post 問道：「究竟係同女朋友拍拖定係同佢身邊嘅朋友拍拖？」至於故事的因由，就是樓主有天上班期間收到女朋友的朋友的 WhatsApp 訊息，內容直斥樓主拍拖方面的不是，並教樓主拍拖，使樓主更想問對方：「關你咩事？」
【相關報道】
【相關報道】
樓主提到跟自己和女朋友的狀況是咁的：「同女朋友一齊咗一段時間，一開始都好哋哋，但漸漸發現大家處事方式同價值觀都好唔同，可能我做緊嘢而佢仲讀緊書，經歷嘅野唔同。間唔中都會因為啲小事嗌交，但每次嗌完都會和好，亦都 feel 到大家都好鍾意大家。呢排同女朋友有啲問題然後雙方都幾唔開心，冷戰咗幾日。」
其後樓主表示有天上班期間收到女朋友的朋友的 WhatsApp，對方表明自己的身份後，就力數樓主拍拖方面的 3 個不是，包括：
- 首先你地由一齊個時已經出咗問題，你應該都知，例如你要返工成日都陪唔到佢，一星期一次都未必見到；
- 一對情侶喺啱啱一齊嗰時應該係最 sweet 嘅時候，正常而言會迫不及待咁想見對方，乜都想對對方講，但呢啲似乎得佢想，你或者冇滿足到呢一點。見得唔多、又傾得唔多，自然就會冇安全感。作為男朋友，要畀佢安全感係你嘅責任呀；
- 如果你真係想 keep 呢段關係，你自己都知你唔可以去鬧返佢轉頭。就算你好委屈，或者你可以打一大段嘢去澄清，想佢明白你嘅心意，但就係唔應該一輪嘴咁講：「你嬲完未」、「你可唔可以唔好咁港女」。
這位女朋友的朋友，更甚至有好計教樓主拍拖。「如果你堅愛佢，只係你唔係好識拍拖，唔係好識點同女朋友相處嘅，咁我希望你畀啲時間佢，畀大家冷靜啲先，因為佢仲傷心緊唔會聽你講嘢」，更着樓主：「如果你可以改變，我相信佢都一定會改變」。
不只樓主對於女朋友的朋友「好言相勸」，有「關你咩事」的感覺外，不少網民看完這個 post 都有同樣想法，甚至鬧爆女朋友個 friend「從中作梗」。「有咩恐怖得過狗公？就係條女身邊啲八婆垃圾豬朋狗友！！！！！全部好識得加鹽加醋玩比較！！！！」、「我同 ex 分手唔多唔少都關佢個女性朋友事，自己諗啦」。當中甚至有網民直言：「似係佢唔識拍拖多啲」。
之不過，觀望這個 post 的留言，也並非純粹大鬧女朋友的朋友多事，都有網民直言女朋友個 friend「有道理」，樓主應重新思考跟女朋友的關係。「其實佢講嘅都啱，不過真係好多事好 odd，可以聽吓，然後唔好理佢」、「講返樓主個 case，你係唔係成日唔多同女朋友傾計溝通？女仔係需要安全感，無論咩年齡都係咁，睇段嘢似係一個星期都未必見到一次。其實情侶之間係需要多啲相處嘅時間，特別你已經出咗嚟做嘢而佢仲讀緊書，係會得閒亂諗，因為佢會驚。如果你真係鍾意嘅，畀多啲安全感佢啦」。
其實事件往後發展到那些地步也好，正所謂：「寧教人打仔，莫教人分妻」，如網友留言所提：「就算係共同朋友、好老死都好，都唔會走去教人點拍拖。人哋有人哋嘅相處方式，外人冇資格加把口」。
精選網民留言：
鬧爆女朋友個 friend「從中作梗」
- 有咩恐怖得過狗公？就係條女身邊啲八婆垃圾豬朋狗友！！！！！全部好識得加鹽加醋玩比較！！！！
- 有呢啲八婆朋友，你一世有排受，忍痛放棄吧
- 答關你 X 事咩八婆
- 我同 ex 分手唔多唔少都關佢個女性朋友事，自己諗啦
- 兩個人嘅事真係唔知關其他人乜嘢事，試過有個 ex 係我想分時仲私底下走去騷擾我啲朋友，即 X 即飛
- 似係佢唔識拍拖多啲
- 千祈唔好照直講 XX 條八婆，得罪佢實喺你女友面前講你壞話，hea 應佢「多謝關心，我知點做」就得
- 其實就算係共同朋友、好老死都好，都唔會走去教人點拍拖。人哋有人哋嘅相處方式，外人冇資格加把口，覺得冇問題嘅你應該都做得依類嘢多
直言女朋友個 friend「有道理」
- 人哋講得啱唔啱先，我覺得又唔係過份呀，有咩問題
- 其實佢講嘅都啱，不過真係好多事好 odd，可以聽吓，然後唔好理佢
- 講返樓主個 case，你係唔係成日唔多同女朋友傾計溝通？女仔係需要安全感，無論咩年齡都係咁，睇段嘢似係一個星期都未必見到一次。其實情侶之間係需要多啲相處嘅時間，特別你已經出咗嚟做嘢而佢仲讀緊書，係會得閒亂諗，因為佢會驚。如果你真係鍾意嘅，畀多啲安全感佢啦
- 真係一星期都見唔到一次？巴打自己小心啦，佢無嘢做想搵你好正常，盡量抽多啲時間啦，我都試過一個返工一個學生，係好難維持㗎
【相關報道】
【相關報道】
Source: lihkg