每 1 代小朋友，總有代表他們的玩具。好像四驅車是「80 後」在孩提時代的代表玩具，而爆旋陀螺在「00 後」和「10 後」心目中，應該也是極具代表性的玩具之一。過去為了提升四驅車速度和穩定性，「80 後」玩家可能也曾以天價購買各式各樣的配件。現今世代的小孩，亦捨得花費購買各式各樣的爆旋陀螺和配件，提升陀螺的作戰能力，甚至願意以 HK$95 的價格，購買看似不值錢的半透明膠圈配件。
事源有網民在「80s 人和事」Facebook 群組內發言，表示其兒子在商場的爆旋陀螺宣傳活動中，以 HK$95 購買了 1 款紅色的半透明膠圈配件。他覺得配件不值此價錢，便喝斥兒子，認為兒子「執到錢都唔係咁駛」。
【精選報道】
從發文回應中，可見原來眾多已為人父親的網民，也有類似的經歷。相關膠圈配件看似價值不到近 HK$100，但原來全部同類型的膠圈配件，均屬於日本雜誌或爆旋陀螺官方活動所送贈的非賣品。單是相關雜誌的售價，已高達 950 日元（折合約 HK$66.9）。若以水貨雜誌來港普遍以「10 算」的方式計算，該紅色半透明膠圈配件售 HK$95 確是合理。與此同時，該紅色半透明膠圈配件也不是最貴的非賣品配件，另有 1 款黃色半透明膠圈配件，在日本 Amazon 的售價高達 3,800 日元（HK$267.4）。最貴的款色是金色膠圈配件，售價更高達 9,700 日元（HK$682.5）！
網民意見
- 網民 A：我好明白樓主心情......Day 1 我個仔為咗個圈要買本雜誌，我同佢交換條件，阿仔又做到就買啦。我見到個盒，心諗百幾蚊連書就算唔係成隻陀螺，係個限定面或者底都 OK 啦。當阿仔好開心攞個膠圈出嚟，我眼都凸埋，第 1 個反應係「我工廠做件咁嘅嘢都唔駛兩毫子......」。我問阿仔知唔知佢只係一個膠圈，佢話知呀，仲立即裝上個陀螺度，我只有嘆......老豆賺錢仔享福。更慘烈嘅事情發生咗... 我問阿仔佢個圈去咗邊，佢同我講已經唔知喺邊......
- 網民 B：呢個膠圈小事啦，我個仔約咗我阿媽去買陀螺，買完陀螺返嚟我問「個陀螺幾多錢？」，我個仔答我「900 蚊」，我心諗係咪痴＿咗線呀呢！呢啲基本裝備嚟㗎啦，總之佢哋玩陀螺嚟講！最慘係逢過時過節，我或者我啲朋友買生日禮物畀我個仔，所買嘅所有陀螺款式原來佢都有齊。咁先最大鑊呀！我統計過買陀螺計埋重複嗰啲冇一萬都有幾千呀！
- 網民 C：價值觀問題，正當如我望住人地拎幾千蚊買高達買波鞋，我都覺得痴鬼線，但用家覺得值，唯有想辦法俾小朋友親身感受知道錢難搵！
- 網民 D：最緊要個仔鍾意，最緊要個仔開心冇所謂啦
- 網民 E：我細個時玩汽槍！買個 O Ring 改槍都成舊水！講緊 20 幾年前！原來嗰野本身值幾過毫子！
- 網民 F：講到尾.....咁你又買？好多野個價值都唔值呢個價，你去街市買菜十蚊斤，你夠可以話自己種只係幾蚊？對小朋友一係買一係唔買，買咗又要同佢講係街見到都唔執有咩意思呢？
- 網民 G：都叫做有一樣物件，好過個仔上網打機，幾千蚊抽 1 件裝備返嚟！
- 網民 H：錢就已經使左，到底係一開口就淨係鬧，鬧到佢淨係識驚，定係借此教佢學識咩為之值得，引導佢學識分析其中價值，甚至激勵佢為得到更好玩具而付出努力呢！呢位老豆，化心痛為啓發啦！你依家幾肉痛，都追唔返啲錢架喇！大好教仔機會，唔好浪費成責罵聲，空餘恨呀！
- 網民 I：娛樂既野不嬲都係用錢滿足心靈，你個仔開心已經係值錢嘅地方，下下要你覺得值先准買，不如你就唔好比人自己買自己鍾意嘅嘢，扯線公仔定你個仔！
【精選報道】
【精選報道】
【精選報道】
Source：80s 人和事 Facebook 群組、ezone.hk