復仇者聯盟 4 熱潮席捲全球！等了十載的荷里活 Marvel 電影「復仇者聯盟 4」正在全球及香港上映，全球「復」迷將陸續闖進戲院接受 3 小時多的史詩級官能享受！與此同時，香港 MCL 院線日前突然在 Facebook 專頁最新發帖，大大隻字「給觀眾的信」略帶甩色，氣氛不對勁，難怪有網民留言直指「嚇死以為結業」！究竟 MCL 院線的帖子，所為何事？
原來這帖子是由「俾你踢過無數次」的 MCL 戲院凳撰寫，致即將入場觀賞「復仇者聯盟 4」的觀眾。MCL 戲院凳在帖子表示，這十年與大家一起觀賞 Marvel 電影，「好開心可以陪住你哋一齊笑過、喊過、緊張過、感動過…」，一起經歷好多，是時候講下心聲。
小記感覺有點不對勁，像要攤牌，要爆了似的！原來 MCL 戲院凳真的有好多怨氣……
準時入場、早些取票
MCL 戲院凳首先呼籲觀眾要準時入場，以免遲入場而阻礙已入場觀眾的視線；又叫大家早些取戲票，或用 QR Code 進場；切勿待到開場前 10 分鐘才去取票，否則弄到大排長龍，導致大家都不能準時入場。
離場帶走 食剩食物
重點係，帖子要求觀眾要保持環境清潔。MCL 戲院凳直線抽擊：「習慣留低爆谷、汽水、紙巾俾我嘅觀眾… 多謝你，下次唔洗咁客氣喇，食剩嘅食物麻煩自己帶返走呀。我唔想你哋為咗我，苦了啲清潔姐姐呀，求放過」。
珍惜戲院 做高質觀眾
MCL 戲院凳突破盲腸，提醒大家要做高質觀眾：「戲院，係一個為大家留下回憶嘅地方，希望大家可以珍惜每一個 movie moment，做個高質觀眾。」
最後，MCL 戲院凳溫提大家「去完洗手間先入場」、「唔好睇緊戲討論劇情」、「睇戲途中影相偷拍呃 like 撳電話就更加唔好啦」、「千祈唔好劇透，千祈唔好劇透，千祈唔好劇透」。
網民：「香港人俾左錢係皇帝」
截稿前，帖子贏得 2,329 個 emoji、118 個回應、461 次分享。MCL 戲院凳的帖子似乎頗受網民歡迎，網民踴躍討論。有網民表示：「真的，自己垃圾自己帶走，如果不小心倒瀉水 / 掉了食物落地，麻煩和清潔員說一聲，不會阻太多時間；否則下場觀眾不小心踩到成地都污糟，睇戲就很不舒服了」、「講到咁白，香港人又話自己俾左錢係皇帝，你收人錢仲鬧客要杯葛架啦」、「最憎嗰啲陪女睇戲但自己唔睇狂玩電話嘅人，唔該唔好下下要人_仲要死撐嘅人（文字經過處理）」、「Well said 🏻應該搵Deanne 姐拍返輯『睇戲顧自己都要顧人哋』」。
「應該出扣分制度」
有網民建議 MCL 推出扣分制度：「啲人睇戲真心好無品，戲院應該出返個扣分制度，扣夠 10 分要 double 戲飛錢。得返一半要上戲院禮儀改進課程，扣到無晒分要禁止入戲院 5 年，幫戲院洗地 / 洗廁所每個鐘加 1 分。大聲講嘢 傾電話 摷膠袋 睇 msg 踢凳 談情談到隔離都知你做緊乜。乜嘢賤人都遇過，有啲仲大大聲鬧返你轉頭 仲未計 帶細路入場睇佢哋一定唔明嘅戲 ，然後細路大喊 嗰啲」。
MCL 給觀眾的信 全文：
【長文慎入】
致各位觀眾：
經～過那些年～ 唔經唔覺，咁就一齊咗十年喇，大家喺度都留低過唔少腳毛。從第一套Iron Man到依家，由菲林進展到去4k，好開心可以陪住你哋一齊笑過、喊過、緊張過、感動過…
咁多年嚟，一齊經歷咗咁多嘢，我好想好想襯今次同大家講下心聲…
成日遲入場嘅觀眾…
其實我知，我明！我知你哋無心遲入場，無心攪到自己睇唔到片頭之餘，仲要喺入場時完美地block晒其他觀眾嘅視線。不如今次試吓準時一次咁多吖？
仲有仲有，諗住早10分鐘先拎飛嘅觀眾…
好想話你知… 當你落到戲院，望住拎飛條隊個刻，真係會睇唔透。個個都開場前10分鐘先拎，成件事就唔止係10分鐘架喇。唔想排到天荒地老嘅，不妨試下用QR code入場，又或者再早多啲啲嚟拎飛呀。
最後，習慣留低爆谷、汽水、紙巾俾我嘅觀眾…
多謝你，下次唔洗咁客氣喇，食剩嘅食物麻煩自己帶返走呀。我唔想你哋為咗我，苦了啲清潔姐姐呀，求放過。
其實我哋可以見證到一個持續咗十年嘅故事嚟到ENDGAME 一刻，真係唔簡單。戲院，係一個為大家留下回憶嘅地方，希望大家可以珍惜每一個movie moment，做個高質觀眾。唔怕話你知，我都好想以後繼續同你地一齊經歷每一個座無虛席嘅moment。
P.S. 今次套戲都至少要坐三小時，記得去完洗手間先入場呀
P.P.S. 唔好再喺睇緊戲個時討論劇情喇，有咩返屋企再慢慢講
P.P.P.S. 睇戲途中影相偷拍呃like撳電話就更加唔好啦
P.P.P.P.S. 千祈唔好劇透，千祈唔好劇透，千祈唔好劇透
祝閣下睇戲愉快
俾你踢過無數次的戲院凳上
【相關報道】
【相關報道】
Source：MCL Cinemas