平治 F1 車隊日前才公佈「咸爺玩多一年」嘅好消息，今日就已經有新「車」發佈，但講緊嘅唔係將會出戰 2021 F1 賽事嘅 W12 戰車，而係由小米推出嘅平洞 F1 特別版電動滑板車 Mi Electric Scooter Pro2。事實上，呢部 Mi Electric Scooter Pro2 並唔係新產品，連香港小米官網都有得賣，但今次呢款 crossover 產品，配上平治 F1 車隊拉花，當然就係瞄準車迷啦！
- 小米推出平治 F1 車隊特別版電動滑板車
- 預計賣 799 歐元
- 暫時小米官網未有發售
將會在本年挑戰第 8 屆 F1 總冠軍的平治 F1 車隊，其 F1 新戰車 W12 要等到 3 月初在發佈，但配上平治車隊拉花的 Mi Electric Scooter Pro2 就率先登場。這部平治特別版電動滑板車，擁有 25km/h 極速，充滿電後可以跑 45km，車頭設有車頭燈，提高夜晚行車時的安全性。常言道，如果迫力唔得，架車有幾快都係無用！所以 Mi Electric Scooter Pro2 平治特別版都好注重煞車性能，採用 E-ABS 及碟煞雙系統，夠晒放心啦！
輪胎方面，F1 玩緊 14 吋胎，呢部平治 F1 版電動滑板車就用 8.5 吋胎；重量有 14.2kg，採用摺疊式設計，方便擺入車尾箱，又或者畀大家帶上公共交通工具。不過提提各位香港人喇，電動滑板車在香港依家未能夠合法在路上行走。換句話，暫時有錢都未必可以在香港光明正大咁玩。咁架電動滑板車幾錢先？799 歐元（約 HK$7,500）有交易，貴唔貴？以 F1 車界來說，買幾件 F1 衫都要呢個價錢啦！
其實，Mi Electric Scooter Pro2 都唔係新產品，如果唔要平治 F1 拉花，香港小米官網賣 HK$3,299，規格幾乎完全相同。話時話，咸爺咸美頓成日都會在 paddock 用電動滑板車代步，唔知佢今季會唔會踩多幾轉，幫小米電動滑板車多少少亮相機會呢？你知啦，咸爺好多中國鐵粉嘛！
【其他報道】中國長城汽車疑留後門？中控台屏幕彈廣告【下一頁】
【其他報道】Hyundai 或 Volkswagen 之爭？預計上半年公布 Apple Car 合作車廠【下一頁】
想睇盡全城最 Hit 科技生活影片，請即【按此】瀏覽同埋 subscribe ezone.hk 嘅 YouTube channel。
Source：小米、平治 F1 車隊