日本係香港人嘅旅遊勝地，唔少香港人就算唔識日文都唔擔心去日本旅行會言語不通，因為覺得好多詞語都可以靠漢字估到，所以好放心咁去自助遊。但係原來有好多漢字，在日文中嘅意思，同中文入面嘅原意係差好遠架。今次就等勁愛日本文化嘅 ezone.hk 記者，帶大家睇 10 個容易引起香港人誤會嘅漢字啦！大家去日本旅行前記得睇睇，以免去到日本會鬧出笑話啊。
1. 勉強（べんきょう）
一提到「勉強」，香港人就會想到一些唔情願去做嘅事，又或者指能力不足但依然要夾硬去做一些事情、牽強、唔自然等，俾人感覺都比較負面。但日文中「勉強」就好正面喇，佢有學習、讀書嘅意思。而「勉強会」就類似港人口中嘅 Study Group，係學生一齊溫書、學習嘅活動，所以如果有日本人話自己鍾意「勉強」，唔好誤會咗佢地嘅意思啊。
2. 風船（ふうせん）
日文「風船」指嘅唔係一隻船，而係氣球咁解。而在日文中都有「気球」（ききゅう）呢個詞語，不過所指嘅就係香港人口中嘅熱氣球，唔好搞錯啊。
3. 人間（にんげん）
中文入面，提到人間，大家都會覺得代表相對於天堂、地獄呢啲概念，係指人類生存嘅世界。但其實日文裡面，「人間」指人類，而人類嘅世界，好多時都會用「人間界」（にんげんかい）去代表。例如著名作家太宰治嘅作品《人間失格》呢個書名，就係指失去做人嘅資格。
4. 手袋（てぶくろ）
「手袋」呢個詞語各位女士要特別留意啊，如果在日本行街見到寫住「手袋」有減價唔好開心得咁快住，因為日文漢字「手袋」指係嘅手套。而香港人口中可以拎出街嘅「手袋」則會用漢字「鞄」（かばん）或者直接由英文「handbag」譯過去嘅片假名「ハンドバッグ」、「バッグ」嚟代表。
5. 泥棒（どろぼう）
唔知見到「泥棒」呢兩個字大家會想像到咩呢？「泥棒」唔係指沾滿泥嘅棍，而係小偷咁解。有時在日本新聞中會睇到「下着泥棒」呢個用語，「下着」（したぎ）係指內衣，所以「下着泥棒」就係指專偷內衣嘅變態小偷。
Source: ezone.hk