大家試在的士上遺留貴重物品嗎？若司機心態不好，大概會一走了之；相反也有好心的司機，會送還給乘客。不過今次在 facebook 群組「的士司機資訊網 Taxi」的情況則有點特殊，司機雖然有送還失物，卻嫌茶錢少，文末明言：「以後執到銀包、電話，據為己有一定唔會有罪疚感！」引來好些網民指責。
稍早前，一名自稱是的士司機的網民，發帖表示：「我又講下我前日有個客响灣仔返䁱麗苑，個客飲醉酒留底左部 s8 連埋電話套入面有幾張信用咭同八達通响我架車度。咁諗住佢打黎比番佢啦！跟住佢老婆打黎揾老公，我就話比佢聽，佢老公留低左電話，叫佢落黎攞番！跟住喺佢樓下些粉交收，响交收果陣我交比佢，佢同我講句多謝話，會表揚我，跟住就想走，我話我特登生意唔做攞番個電話比你，茶錢都有啩！咁佢跟住比左四十蚊我就走左！多謝呢個客人，令到我以後執到銀包電話據為己有，一定唔會有罪疚感！因為係佢地自己做成嘅！」
此帖引來不少迴響，部份網民表示：「本來係一件好人好事，但而家就⋯⋯其實就貪心但又要扮好心，咁等錢洗咪攞左佢攞，又唔係，咁又人比幾多就會滿意呀？$500/$100/$2000？」、「茶錢老 L 奉俾㗎？！」、「樓主真係好呀，俾大家再一次睇到的士大佬們嘅品行，多謝你」、「人哋衰、冇品，自己就比佢更衰做犯法事？希望師兄只是一時講悔氣說話」等。
【網絡熱話】
【網絡熱話】
另外亦有疑似是行家的司機留言：「我就會問下個客你趕唔趕住攞返，趕住攞返我就起錶車返畀你，即刻照錶收費唔趕嘅我順路先兜返過嚟畀你」、「有時唔使講明，你話收工先得閒交收，啲客會自動波，講到明又比人批鬥」、「上次有次留野係車，hk接，我又係專登囉返比佢，多謝都無」、「講真，我就唔望回報嘅，近近地可以即時比你，遠嘅就收工先搵地方交收，如果串嘅，我收工拎到落馬洲警署都唔比返你」等。
面對各種指責，該名司機回應：「我自己都試過响的士度跌電話，有個响沙田醫院女學護執到比番我！我都特登去買個利是封封番幾百蚊利是比個女學護！之後我每次執到電話都比返人！」、「我試過七個月前執到部 iphone 6，收工拎去旺角警署！個報案室警員一開口就話我，點解你 d 司機咁鐘意收工先攞 d 電話黎，你知唔知我地收工收幾點？我話我點知阿 sir 你收幾點！跟住佢就好唔耐煩咁幫我落份口供！然後仲同我剔埋如果三個月冇人認領我都唔可以要個電話，跟住對份口供叫我簽名，我問個阿 Sir 你做咩幫我揀埋，跟住佢話叫你簽就簽啦！我跟住火都黎埋話你幾号冧巴我要見你上司！佢先死死地氣同我講對唔住話由於有私人資料所以執到三個月後都唔可以比我，跟住我費事同佢玩 (趕住交更) 先求其簽個名就走左！攪完一輪仲要谷氣下次我唔會再攞去差館！」最後他更表示：「下次一定唔會再扮好心！」
Source：的士司機資訊網 Taxi