在當今快速發展的電動車市場中，越來越多新品牌出現，當中由廣汽集團推出的埃安 AION，便以性價比加獨特設計攻港，首款登場的 Y Plus 以其創新的設計和技術，帶來集性價比、玩味於一身的 MPV 與 SUV 泥合體。
即刻按此，用 App 睇更多產品開箱影片
AION Y Plus 的車頭採用全幅式設計，兩則設有天使之翼大燈，而尾燈亦採用相呼應的連貫式設計，外觀相當有活力。它提供了 7 種外觀顏色和 5 種內飾主題，讓消費者根據個人喜好自由搭配車身和內飾。此外，車輛還配備了 2 種個性化定製的雙色輪轂和行李架顏色，讓每一位車主都能打造出屬於自己的獨特 Gen Y 純電座駕。車身，採用五門設計，大小像 MPV 與 SUV 的混合體，可以變出多種使用可能性。
AION Y Plus 採用 AEP 2.0 電動車平台，車身尺寸為 4,535 x 1,870 x 1,650mm，軸距達 2,750mm，車身寬敞，並不像入門車般局促。它搭載的電動驅動系統，提供 204 匹馬力，以及 225 Nm 扭力，動力算是十分充足。此外，它提供 Eco、Normal、Sport及i-Pedal四種駕駛模式，喜歡熱血的朋友可選擇更爽更快的 Sport Mode。值得一提，較特別的是 i-Pedal 模式，可以用油門控制車輛拖慢停定，在市區走走停停的路段，能大大減少剎車頻率。
它支援兩級動能回收設定，可以在剎車時回收電力，透過其內置 61.5kW 彈匣防爆電池，能提供 490 公里 (NEDC)續航力，並可對應 120kW DC 快充，約 30 分鐘便可由 20% 充至 80% 電量，滿足用戶的日常通勤和長途旅行需求。同時，車輛的智能駕駛輔助系統，例如是 ABS、EBD 剎車輔助、ESP 電子車身穩定控制、TCS 牽引力控制等，都能為駕駛者提供了更安全、更便捷的駕駛體驗。
在操作上，它的仿皮呔盤手感舒適，並設有眾多功能按鍵，方便行車時可即時調節車內的各項功能，同時它採用 10.25 吋數碼錶板，顯示各式各樣的行車資訊。此外，它還標配 360 度環繞影像系統，隨時隨地都可清楚了解車身周圍的情況。
AION Y Plus的內部空間設計充滿創新，不僅提供了寬敞的乘坐空間，還有諸多智能化的儲物解決方案，使得車內環境既實用又舒適。座椅用上雙色仿皮包裝，它最特別之處，是座椅可大幅度調整，後座可以 40 : 60 收摺或放平，而前座亦可以幾乎放平，建構成雙人大床，加上全景式天窗，以及 32 色氣氛燈，以及 PM2.5 過濾冷氣系統，玩車中泊亦不成問題。在娛樂系統方面，它設有 14.6 吋巨大屏幕，並可以用 Apple CarPlay 連接手機，串流播放手機上的多媒體內容。
【專家試車】
AION 響香港比較少聽同少見，究竟呢部 Y Plus 係咩類型嘅車呢？
- 佢係廣汽集團響香港推出的其中一個品牌叫做 AION，佢嘅定位內地就叫 MPV (Multi Purpose Vehicle)，香港就經常都當做 SUV，不過大家坐落去嘅時候，大概都會覺得有分別，(Legroom 好闊啊！)係啊，好闊嫁，睇佢裝嘢好似好多，一陣我們就試試裝到幾多嘢。你見到佢成架車內部都係好闊落，所謂 MPV 即係裝人同裝貨都得，SUV 基本上就當係 Jeep 咁，多用途嘅，但未必有人會拎架 SUV 裝貨，但 MPV 仲可以有機會在旅行、去沙灘想裝多啲嘢，架車闊落啲自然就可以裝多啲嘢喇！
我知道呢架車仲有樣特別之處，就係前座可以差唔多躺平咁瞓，而後座都可以 40 : 60 咁差唔多平放，呢樣我覺得係幾特別，響香港其他車都好似好少見呢！
- 因為之前疫情好多人都響車上瞓覺，駕車四圍去食飯，但我覺得呢個潮流係唔會變，你見到日本都好多開車四圍去，甚至乎響車度住，但香港人好少響車度住，不過如果話開車出去泊在一邊，有咁靚的天窗，將張床瞓低，數吓星星都幾開心！(去露營都幾好啊！)
我見佢除了平時見到嘅 Sport、Eco、Normal 模式外，仲有個叫 i-Pedal 模式，究竟係乜玩法呢？
- 宜家我就用緊 i-Pedal Mode 開緊，i-Pedal Mode 就似其他電動車的 One Pedal Drive，一腳走天涯，即係踩電門就加速，放開就會減速，根據廠方講，呢個功能當放腳後就會一路拖慢部車，但唔會落剎車，有其他廠牌就會落，總之結果就係希望讓車主一腳就可控制，即係隻腳好少情況要去落剎車，除非緊急事情，平時一路行的時候，就可以一腳走天涯，呢個都係電動車的特點。
我們都試咗一陣呢架 AION Y Plus，你覺得佢嘅性能點呢，駕駛體驗如何呢？
- 呢架車馬力 204 匹、扭力有 225Nm，我宜家開咗一段路，我覺得電動車都真係幾夠力，好似呢類上斜位，你踩電門佢就去，宜家用緊 i-Pedal Mode，佢仲有個 Sport Mode，如果鍾意開快少少的話，用 Sport Mode 佢仲會有多少少衝刺感覺。
總結：
雖然 AION 呢個品牌響香港比較少見，但係佢響國內已經好興，特別是網約車平台上面。因為本身呢架車既是 SUV 又是 MPV，即係話佢又係多用途，又可以當係 SUV 用，一家大細去玩又 OK，有時你知有些人網約架車，到達嘅時候又唔係淨係載人，可能幾箱貨，變咗多用途就肯定有佢嘅用處。除咗係網約車的熱門選擇之外，佢仲係一家大細出遊的好選擇。有個咁靚嘅天窗，加埋座椅可以 180 度躺平，完全瞓低，即係話可以休一下，甚至瞓幾個鐘都仲得，我覺得如果咁樣響度數吓星星都幾浪漫！
【熱門報道】
Source : ezone.hk