港媽一家三口入伙新居，在Fb群組分享裝修心得，全屋家具多由淘寶購入，包括購買的浴缸、洗手盆、洗手盆櫃桶、浴室摺疊門、晴空燈、廚房組合架和洞洞板等；在裝修過程中，還有不少注意事項和經驗，值得大家借鏡。
即刻按此，用 App 睇更多產品開箱影片
近日在Facebook群組「家居裝修設計分享Group」，一名女網民發帖分享，一家3口和外傭最近搬入新裝修新居，當中她花費不少心思在廚房和廁所的裝修上。她指新屋裝修風格和規劃主要由她一手包辦，由於她想要的物料、設計和款式在香港較難找到或價錢較貴，故她花費數月時間上網找靈感，上「淘寶」和到灣仔、旺角尋找，同時不斷跟裝修師傅商討，才能達到今次效果。
【延伸閱讀】
裝晴空燈打造日式「無印風」
首先在廁所方面，主要走日式「無印風」，花紋瓷磚、日式洗手盆、洗手盆五金櫃桶、樹脂鏡櫃、防夾手日式浴室摺疊門、藍色晴空燈、洗地水槍、電動廁板均是從「淘寶」購入。由於小孩喜歡浸浴，但因浴室較小、難以找到適合尺寸的浴缸，故她向「淘寶」商家訂造「方形浴缸」，再交由裝修師傅安裝。
對於打造無印風，她認為洗手盆櫃功不可沒，晴空燈亦是另一重點，「係有一種好似喺沙灘嘅感覺，當你浸浴望住上面晴空燈就會覺得好放鬆，如果你哋個廁所係黑廁嘅話更加適合」。至於浴室摺門則非常慳位，採中空設計的洗手盆則易於打理，
「而家呢個洗手盆極度容易清潔，又唔會發霉，呢一種中空嘅洗手盆嘅好處係，下面可以擺凳仔或者兒童廁所，真係非常之方便。」
事主直言，當初決定這樣裝修時曾被人反對，但她堅持如此裝修，過程雖然辛苦，但對成果非常滿意，「最後出嚟嘅效果確實係超乎想像，直頭嘔心瀝血，因為真係研究咗好耐，周圍搵咗好耐嘅成果嚟」。
廚房組合架 整齊收納廚具
廚房方面，櫥櫃拉籃、洗碗機、調味架拉籃等均為「淘寶貨」，她指只需提供廚房尺寸和自己想要的款式，賣家就會附上設計圖，「佢哋就會免費幫你設計點樣擺位同埋用邊啲產品適合，仲出埋設計圖畀師傅跟，最後買咗直接運去師傅間廠嗰度裝嵌，出嚟效果真係好好，完全滿足到我想要嘅嘢！」
至於另一邊就是使用宜家家居（IKEA）的廚房組合架和「洞洞板」作主要收納，在廚房牆上整齊放滿鍋具和家電，她形容吊櫃、地櫃和地板顏色都是互相配合，全屋淺灰綠色的用色基本上一致，以打造「無印風」。她最滿意是掛架的部分，非常容易打理，
「其實呢個係我由上一個屋開始已經咁做㗎啦，同埋完全冇油煙漬㗎，其實呢一種收納方法對於會煮嘢食嘅人嚟講其實會係好方便，例如你想去拎個鑊炒餸，你只要一拎就可以，然後要唔同嘅工具都係咁樣，你試吓去一啲西餐廳都會見到呢一組廚房掛架組合嘅。」
事主的分享帖文獲不少網民大讚其新居裝修設計漂亮，「好正，多謝sharing，畀到好多資料，簡直示範單位」、「好正你個廚房」、「你呢個帖好有收藏價值」、「好靚，用盡晒空間」、「學到嘢，感激你的分享，期待下文」、「好靚，好有心思同心機」、「又靚又實用，你好叻」。