嗌外賣已成不少人日常，然而，有網民網上大呻，一次嗌 Keeta 外賣的經歷，竟由期待美食變成一肚子氣！事緣該名事主透過 Keeta 點餐後，收到外賣員的「溫馨提示」，暗示希望獲得貼士。事主未有理會，豈料之後收到的餐點，竟如垃圾般被棄置地上，賣相慘不忍睹，令事主嬲爆！事件在網上曝光後，旋即引發網民熱議，更釣出疑似涉事外賣員親自回應！究竟孰是孰非？Keeta 平台又如何拆解這場公關危機？
外賣員疑不滿索貼士不成功 亂丟外賣發洩
有網民在Threads上發文，控訴外賣員索求貼士不果，竟亂扔外賣發洩情緒。從事主分享的圖片可見，外賣袋東歪西倒，不單裡面的食物醬汁滲漏出包裝盒，事主打開外賣袋後，更驚揭打翻食物，食物包裝盒內空無一物。
事主將事件向外賣平台客服投訴，不過客服表示只能賠償代金券。事主不滿意賠償方案，雙方協商不成功。
帖文發布後火速引來熱議，網民認為外賣員態度不正確，「點解個外賣都未送到 可以問人哋攞tips」、「唔知點解總會有呢啲咁厚面皮既人」、「外賣仔唔識尊重自己。」有人分享過往經驗，「我曾經同客服理論個半鐘後 成功爭取退全數加代金券」、「依家咩平台都要send email先肯退錢...」、「打card centre turn左筆交易佢再慢慢嘈。」
∇網民分享不快外賣經歷∇
涉事外賣員留言：或者係真係放得太衰令到灑漏
自稱涉事外賣員今日於帖文下方留言，直言「唔好意思，令你有咁唔愉快嘅經歷，我相信呢度可能有少少誤會。」他解釋「將到外賣擺喺地下係因為你嗰袋嘢有6個餐 如果擺喺門上面隨時會直接跌落嚟倒瀉/爛曬 所以先退而求其是擺喺門口嘅地下。」
外賣員亦有解釋主動向事主索取貼士原因，他指自己為步兵，送此單成本高，「所以我問一問睇下可唔可以…減低損失...」
外賣員回覆惹起一眾網友炮轟，批評「其實你有門鐘唔撳，唔好好地將啲食物交喺人手上，特登將啲食物放喺地下，好明顯已經係你黑心玩嘢啦」、「減低你損失？你其實可以踢左佢架，咁就$10車費都慳番」，亦有人覺得外賣員應該要將心比己，「換個角度你嗌外賣 送到嚟pat喺地下倒瀉晒你會點？」有人建議「想人俾貼士 更加應該㩒鐘 人哋話唔定摷10蚊8蚊散紙俾你。」
Keeta已回覆事主及賠償
事主再發文，指Keeta外賣平台已派員聯絡自己，並作全單退款及賠償。事主亦問到，平台會如何處分該外賣員。
Keeta 補充，Keeta重視用戶體驗，已按照既定程序處理該個案。Keeta亦向所有送遞員夥伴發出指引，提醒送遞員夥伴即時通信功能僅用於溝通與配送訂單直接相關的事項，例如確認送達時間、送達地點、有關注意事項等，向顧客索取額外費用、提供其他非配送訂單之服務可能被視為誤用或不當使用，Keeta不排除採取行動干預，確保為用戶提供高效且專業的配送服務。
來源：Threads