自攜大大隻虎蝦到食店蒸，上碟變了縮水蝦米？網民 Lok Chan 日前在面書群組「巴打絲打 Facebook Club」，表示自攜手掌咁大隻嘅虎蝦到食店加工蒸煮，豈料上碟變成縮水蝦米仔！樓主表示要報海關，食店老闆娘才「笠水」肯賠償 HK$390。然而有聲稱是食店負責人的網民 YuEn Cny 亦於同日在該群組發帖，直指「真金不怕紅爐火」沒有欺騙，又話肯賠償只因不想該食客阻住做生意；及後又再發帖表示已經報警備案。
「老闆娘笠水賠償」
事主食客 Lok Chan 在帖子表示：「出去食飯過節，食到一肚氣。買虎蝦去加工，成個鐘都未有得食，之後拎咗碟蝦俾我地，睇見即時起火，仆你個_（文字經過處理），我買二百幾蚊斤虎蝦俾佢蒸，佢竟然求其拎碟普通海蝦俾我，仲同我講蝦蒸過會縮水，我一星期唔係食魚就蝦蟹，佢竟然當 D 客係白痴，我話報海關，個老闆娘即時笠水，呢間黑店係 _ _ 街市 _ _ 熟食中心（文字經過處理），大家千其唔好幫襯，極度無良商家！」隨帖上載了 4 張圖片（如下），從圖片可見，真係手掌咁大隻虎蝦，上碟疑似變成縮水蝦米仔！
原來是虎蝦溝海蝦？
帖子引來極大迴響！截稿前已贏得 6,858 個 emoji 心情、1,247 個回應、1,233 則分享。網民紛紛表示嬲嬲，對大蝦變蝦米感到嘩然。
好戲在後頭。
據了解，食店負責人後來搵到事主購買虎蝦的檔主做證，事主遂改口在購買時是購買了一隻虎蝦，再溝海蝦。吓？究竟誰是騙子？
【精選消息】
「一隻虎蝦屈人成碟」
那邊廂，自稱負責人的網民 YuEn Cny，於同日也在「巴打絲打 Facebook Club」發帖，直指「真係當人白痴嘅咩。一隻虎蝦屈人成碟。」他表示：「做呢行真係好怕做到你呢種客。利申：我係其中一個負責人。我係呢個場做左十幾年！口碑一直都好好。真金不怕紅爐火。」
YuEn Cny 續稱：「收海鮮，上菜接投訴唔係同一個人。加上當時飯巿，根本無人手。客人主動話要求賠 390 了事。因為唔想阻住做生意所以賠左比佢。」
「不過錢賠左，人走左。講乜都冇用。如果真係覺得小店呃人嘅。可以報警或海關，因為我一對手真係唔夠咁多對手打字。大家當花生 post 睇又好，要攻擊小店都冇辦法，網上嘅力量我知好大，我只可以講，我地無做過呢啲咁嘅事。點解要賠錢，係因為唔想因爲 390 阻住成晚生意。」
【精選消息】
食店搵到賣虎蝦檔主
及後，YuEn Cny 又在另一面書群組「Tai Po 大埔」發帖，表示已成功聯絡事主購買虎蝦的檔口。YuEn Cny 稱：「店員聲稱當晚佢地買嘅係海蝦 280 蚊一斤。佢地就買左三百幾四百蚊。當時該名顧客去到時虎蝦只係得返一兩隻。咁店員就問，喂你要唔要埋呢隻呀？精選黎嫁。該名顧客就要左一隻，就係大家係原 post 見到果一隻。因為呢兩日都係假期，所以店主未能提供當時嘅 cctv。其後拎到一定會拎返上黎比大家睇！」
oops！原來事主只係買咗一隻虎蝦？咁隻虎蝦上碟去咗邊？
「開左邊係會縮少少」
YuEn Cny 描述當晚事發經過，表示該食客是 walk in 並自攜虎蝦要求加工，當上碟時，發現縮水不對勁，遂搵負責人對質。YuEn Cny 稱：「咁負責人就話：開左邊嘅蝦係會縮少少。但睇返張圖其實個蝦真係蒸得過熟，十分抱歉。之後佢地就話：我隻隻都咁大隻嫁喎，你求其攞碟蝦黎？再講落去就話：唉，得啦，你賠返 390 比我，我走。唔想同你嘈。之後負責人就做左件最錯嘅事，答應賠償！賠償唔係因為身有屎，而係唔想阻住生意同真係冇人手。做飲食都會知道節日有幾恐怖。」
【精選消息】
食店揚言警已報
「佢果碟蝦當中唔同色蝦殼果隻就係佢唯一果隻（見下圖）。其實蝦頭已佔左蝦嘅 3 分 1，係相到大蝦冇左個蝦頭而其他海蝦有半個蝦頭所以睇落 size 差唔多。但蝦殼顏色可以分辨。」
YuEn Cny 在帖子文末表示：「今日都連同琴晚賠錢比客嘅負責人去警署備案。警方都叫我地往後有呢啲情況唔好賠錢，直接報警。建議我地寫海鮮影返相，雖然係好曬時間，但今次經驗後每步都會做返足。我地都希望當時人會返黎當面對質。因為你一個動作。令到我公司及我本人受到好多不公平及無理嘅評擊！我希望各網民可以還我及我公司一個公道！」
Source：巴打絲打FacebookClub, Tai Po 大埔