為讓自己能夠安全、舒適地乘搭巴士，相信不少人已謹記緊握扶手、車未停定切勿上落車等乘搭巴士的規矩。之不過，所謂意外，就是意料之外吧，不論乘搭哪種公共交通工具，都可能有小意外出現。近日有網友報料提到自己的 6 歲小童跟親友一同在灣仔消防局乘搭城巴 681 回馬鞍山的途中，疑因車長急剎，小童在樓梯上飛跌到樓下，不只當下即場流鼻血，事後更發現右手手腕骨折。惟意外期間，因當時該網友的親友不懂處理，因此沒有即時報警，但強調車長是知道這事故，不過過後該網友跟城巴報告事件，更指對方回覆：「車長無上報事件，無人知發生咩事，仲話個小孩都唔知係咪第二度整親」。
【精選消息】
【精選消息】
該網民出 post 後，更補充一句「奉勸各位如果遇上以上任何類似問題應立即去急症室，拖一拖人或者事都被扭曲。」到底此 post 一出，其他網友又有何回應呢？觀望不同平台的留言，似乎多數網友覺得事故不是錯在巴士司機急剎，而是家長沒有好好照顧小孩，甚至連基本照顧小朋友的方法都不懂，以及忘記了緊握扶手、車未停定切勿上落車等乘搭巴士的基本守則。更甚的是，有當日在巴士現場的乘客留言「還原真相」！「我當時係巴士上親眼目擊事件，事發時行車中，小朋友飛左落嚟。其實行車上真係唔應該同小朋友上落，事發時大家都嚇親，最擔心係個小朋友有無跌親。希望小朋友早日康復」、「我當時喺車上面，雖然冇見到細路跌落去，不過我可以判定你冇拖實個小朋友，當時車剎得真係唔急，我放係大腿上啲書穩穩陣陣，但係樓梯突然傳來個阿爸嘅聲音『喂喂』，然後見到成堆人望住樓梯」。
精選網民留言：
- 巴士司機可能係有唔啱，但大人都要好小心照顧同行嘅小朋友，由其行車途中上層就緊危險，希望小朋友快啲康復啦
- 唔好怪我黑心，因應路面情況而急煞周不時發生，有無緊握扶手先？有握到扶手最多撞一撞牆，而唔係飛出嚟囉，自己都有責任，無理由賴哂個司機
- 純討論：如果同小童乘車，我會給同行小孩先上車上樓梯，自己包佢地尾。相反下樓梯下車，我會先行小孩前面，也是保護他們。兩個做法是有事時大人可支援保護小孩。
- 其實行車中你唔坐定定或企定扶好又唔怪得司機嘅......不要一發生事就別人的錯。
- 其實車長急停應該都係想避開路上突發事情，無可能同大家講完我要急停先嚟做。細細個都已經教，停定先落車。小朋友人已經傷咗，應該即時報警，接受治療，並唔係同司機理論......
- 路面情況難以預測，急煞經常發生。明知車行緊，一係就等車停定先落樓梯，一係就大人捉實個細嘅！如果有捉實嘅冇乜可能會飛落去。唔好將自己的責任推卸比司機，咁樣點教仔？
- 其實好多人怱視左一個重點，就係司機知情不報。而家講緊巴士公司覺得呢件事唔存在先恐怖，如果真係司機剎錯車呢？點講都好，知情不報真心無問題嗎？
- 有細路就咪走上上層啦
- 唔通前面有車硬 cut，唔急煞照隊埋去？冇話邊個啱邊個錯，只不過呢啲情況真係好難避免得到
- 有啲人話巴士唔應該急剎，根本傻的嗎，行緊車點會預有人落樓梯（雖然真係有）
Source: 沙田友 Facebook, hkgolden