為理想，你可以去到幾盡？27 歲港男「乾乾好」日前在 LIHKG 討論區發帖，題為「我曾經為咗生活而放棄夢想，頭先我辭咗職，只為為咗想試一試」。樓主表示生於單親家庭，曾為了病母，以及供弟弟讀書，18 歲的樓主沒有升學而外出工作搵錢。現在病母好轉，弟弟可以半工讀，樓主「冇嘢困身」。某天，樓主在一個中學的箱內，尋回當年遺下的一些東西，重遇夢想，頓時哭崩。樓主遂給自己 3 年時間重新出發追夢，並發帖與網民分享，發放正能量。
病母街數細讀書 巴打棄學去搵錢
樓主在帖子剖白：「小弟今年 27，18 歲之後因為屋企問題而冇去升學出去做嘢，因為屋企係單親，要照顧有病嘅呀媽，仲有啲街數要找，細佬個陣仲讀緊書要供養，唯一好彩就係呀媽都可以返下 part time，所以就咁樣過咗 7 年。」
【精選消息】
小記放低了花生，眼淚心裡流，專心聆聽。
樓主續稱：「直到今年初細佬出咗去讀書，可以半工讀，街數又找完，呀媽個病有好轉，我終於冇嘢困身。」
咁又點呀？
重遇遺忘夢想 搵番雄心壯志
早幾日執屋個陣，樓主搵返以前中學嘅嘢：「其中有一個箱，裡面有啲畫，幾個劇本，一部 DV 機，開返張 SD 卡嚟睇，我真係喊咗出嚟，我咁多年嚟，都遺忘咗自己嘅夢想，我搵返嘅係當年雄心壯志，對未來充滿夢想嘅自己，我一直想做關於電影嘅嘢！」
嗚哇！！！
樓主向病母交代要裸辭：「之後我同呀媽講呢件事，話會辭職，佢同我講咗句對唔住，同我講咁多年嚟辛苦咗我，浪費咗我咁多時間，」
「我會追返嚟」
樓主向病母豪言：「唔緊要，我會追返嚟的。」
【精選消息】
就係咁，樓主今日（10 月 18 日）就辭咗職。他說：「可能你會覺得我好傻，呢個咁尷尬嘅年紀追夢好不切實際，但我唔想比自己嘅人生有遺憾。希望我可以比多啲正能量大家，有夢想有自己想做嘅勇敢去做，當然要考慮自己嘅能力啦。期限 3 年，呢個期限之前都冇起色我就會完結呢個旅程 。」
如此激勵的帖子，網民深表支持，紛紛讚好。截稿前，帖子已贏得 4,846 個正評，46 個負評。不少網民踴躍回應，留言鼓勵：「做左後悔好過後悔冇做」、「27 歲男仔仲未算大，快 d 追番失去既時間，比心機」。
網民不屑：「懶感性」
當然，也有花生網民搞搞震：「下，你係咪有問題。你自己都識講，你屋企係有問題，咁就應該向現實低頭。你應該正正經經打份工，然後買樓結婚生仔買車請工人。而唔係走去追埋哂 Ｄ 不知所謂既夢想。仲要係電影，死路一條，依家細路仔玩泥沙咩，望下你 Ｄ 同學啦，個個事業有成呀。懶哂感性咁，正咩能量？你只係借夢想之名，逃避現實，」
即遭巴打狠批：「你唔識字定冇睇到篇嘢?定還是閱讀理解拎 U ?樓主就係搞掂好屋企啲問題先出去闖，重睇一次啦你！」
【精選消息】
其他網民意見，節錄如下：
- 我上年 28 歲辭咗份 manager 級嘅工作去外國 restart 人生都係咁，下年接埋女朋友過嚟計劃結婚，巴打加油。
- 要攞個仔幾十萬醫自己個病，搞到佢冇晒青春冇晒前景，我係佢阿媽就唔醫算。
- 加油，支持你。最近我都裸辭，都係想做自己想做 ge 野，一齊加油！
Source：LIHKG討論區