香港被譽為「美食天堂」，世界各地的美食都可以在香港食到，但部份食物或為迎合港人的口味，會作出稍微的調整，與在原產國進食會有一點出入。不過，可能因為港人習慣了貼近大家口味的烹調方法，反而食到正宗煮法時，便會覺得口感有異，甚至認為店家的做法有誤。近日，一名網民在某西餐廳內點了一份大蝦扁意粉，但樓主進食時卻認為意粉「未煮熟」，所以要求店家再加以烹調，但第二次進食時意粉依然「硬咗啲」，而且服務員態度欠佳，令樓主大感「中伏」並在 Facebook 群組內分享，結果反被網民嘲笑自己「唔識嘢！」
【相關報導】
樓主稱自己在觀塘某餐廳內點了一客大蝦扁意粉，下單之後等了約 40 分鐘後終於上菜，但當其嘗了一口後，指「中間係生」，同時向服務員反映，但對方卻告知稱此類意粉的質感是相對較硬，樓主不能接受並詢問能否更換其他食品，但服務員卻表示「整咗啦啵，攞返去再煮咪得囉。」之後便把意粉收走並加以烹調。待意粉第二次上檯後，樓主稱比第一次好，但口感依然偏硬，不過自己亦無打算再向店家反映，並指「再叫佢煮又可以點？」，同時指服務員的態度欠佳，特別是意粉經第 2 次烹調後上菜時的態度，令樓主感覺在此餐廳進食有「中伏」的感覺。
不過網民似乎並不同意樓主的意見，有網民更直指樓主「唔識嘢」，並稱：「正宗意粉係硬硬地喎, 同 risotto 一樣, 咁如果叫 risotto 會唔會話人哋比唔熟嘅米你食？」、「唉，唔識就話人伏！Al Dente 都唔知，去大 X 樂食啦。食湯意都得，唔淋就浸淋先食」、「正式意大利 style 係硬即係 al dente，如果想淋就去港式茶餐廳啦」。不過亦有支持樓主的網民稱「先唔講碟意粉生定熟， 等咗 40 分鐘都已經夠出事，碟野啲汁成邊都係」，同時指口感是非常主觀的事，但態度差則「唔會幫襯！」
【相關報導】
【相關報導】
Source：中伏飲食報料區 @ Facebook