星期日（7 月 21 日）晚發生「無警時份」，大量市民在港鐵元朗站被白衣人士瘋狂攻擊受傷的事件，成為這幾天全城關注的焦點。雖然港鐵 MTR 已在 FB 出 post「強烈譴責暴力行為」，並略提事發經過、控制中心報警時間、列車不停元朗站、關閉元朗站等資料，不過不論港鐵 FB post，以至之後在網上流傳的車長與控制中心對話內容等資料，似乎未能為市民釋除當日元朗站暴打市民事件的疑團，甚至涉事女車長更成為眾矢之的，被全港市民謾罵。有自稱港鐵員工對市民斥「涉事女車長處理不當引致乘客被打」的說法看不過眼，更試以 4 點分析當日慘案，以及認為「我哋前線其實對於管理層嘅解釋亦感到非常憤怒，要怪嘅麻煩大家將個矛頭繼指向我哋嘅高層，直到佢哋肯出來交代清楚責任問題為止。」
【相關報道】
【相關報道】
自稱港鐵員工 4 點分析 7．21 元朗站暴打市民事件：
1）首先，一定係 CC（Chief Controller，TC 老闆）食，就算 TC（Traffic Controller，行車控制）要落清客 order，都要得 CC 同意先可以咁做，呢個絕對唔係 Tcap（Train Operator，車長）自己嘅意思，我希望大家明白。
2）架車就行 ATO（自動駕駛）嘅，佢一對正幕門就會自動開門。到閂門嗰陣而家啲 1900 係 Mod（改裝）咗閂 3 次門都閂唔到，就會長開唔能夠再閂。仲未計畀人拉咗 PAD（車箱入面嘅緊急通話器）係行唔到車，要行出去 reset 先可以行到車。全部都係架車嘅設計問題，出面成班 X 街話要個車長食？有冇搞錯？
3）針對番片段中女車長嗰句「我唔可以講㗎。」其實公司係訓練嘅時候，係有講過所有嘢都係應該有公司公關嗰邊去答，而唔係車長自行去解釋。但昨日如果大家有睇過立場 live 嘅朋友，應該都知道公司嘅所謂公關其實係咩都冇講，講咗等於無講。完全冇話畀大家知其實女車長可以做嘅真係好有限。
4）關於點解車長、站員唔出現幫手嘅問題。呢個亦係公司訓練係有提過，我哋必須喺保證到自身安全嘅情況下先至可以執行職務。我哋唔係擁有合法武力嘅警隊，而我相信有人亦都睇到，當時元朗站入面係有狗嘅，但遲遲都唔出來，咁我想問嘅一個問題係，設立鐵路警區到底有乜嘢用？最需要人幫嘅時候，我哋嘅職員同市民都受唔到應有嘅保護。
雖然樓主對於港鐵對事件的處理是憤怒至極，認為不公平對待該名女車長不公平外，更提到「公司一方面同我哋講話唔好將風險擺喺自己身上，有乜嘢上面會幫你頂；另一方面就係個記者會到乜 X 都唔講唔澄清，由得市民大眾咩都唔知繼續插爆女車長，咁樣就叫幫我哋頂？？」但不少網民認為處於非常時期可有非常方法處理，並非盲目跟隨公司指引工作，「前線應該至少可以幫手 close gate 隔開市民同黑社會吧......」、「站長更高級，更有決斷能力，都可以叫咪」。
之不過，一眾網友也同意樓主所提「前線員工無罪！公司必須出來解釋」，希望「MTR 公布錄影同完整錄音帶」、「推到港鐵行出嚟交代」，讓大家有更多渠道得知當日事件時序，方能令事情水落石出。
精選網民留言：
- 要求 MTR 公布錄影同完整錄音帶啦
- 一齊推到港鐵行出嚟交代
- 唔想成為高層犧牲品，該負責嘅人點解可以完全冇人指責，但淨係將風向吹向最底層嘅員工
- 唔係行內人，不過公道咁講，營運一個咁複雜同需要極度穩定嘅系統，一定有好多標準程序畀員工去跟。呢啲標準程序會非常仔細，仔細到要求喺某個情況下、幾多秒鐘內，要㩒邊粒掣去執行某個程序。咁嘅情況下唔會有幾多空間俾車長去判斷同決定，所以好難話車長錯。不過個肥妹黑面又無同理心係黑人憎。
- 我覺得嗰個狀況下，站入面嘅前線職員報完警快手走去安全位置，盡量幫人走好過。唔係話唔理乘客。但個咁打法已經唔係前線可以控制到，救咗自己先
- 唔認同，你咁樣係 blame the victim。港鐵公司有咁嘅制度、規矩，車長講等於搏炒，唔講就齋等公司質自己食死貓，對車長完全係唔公平。矛頭應該指向港鐵公司。
- 唔係講咗又點嘅問題，而家如果一個有良心嘅人，係嗰時候係會盡力諗點幫到受害人，而唔係諗住公司守則唔畀做啲咩
- 之前金鐘，個車長都講香港加油，我唔會話講咩有用，但係一定唔會叫晒啲乘客落車，最起碼都講番句叫佢哋停手
- 黑警嘅部分我完全認同。所以要睇番女長車幾時被訪問、被訪問時知唔知成件事來龍去脈。
- 但係前線應該至少可以幫手 close gate 隔開市民同黑社會吧......無怪過前線，但係好心痛，希望你地有更多應變措施
【相關報道】
【相關報道】
Source: lihkg